Կոնսերվատորիայի այգին վերադարձվեց Երևանի քաղաքապետարանին

Տարիներ շարունակ վարձակալի անբարեխիղճ գործունեության հետևանքով անխնամ ու անմխիթար վիճակում հայտնված Կոնսերվատորիայի այգին կբարեկարգվի՝ դառնալով հանգստի ու զբոսանքի հարմարավետ և գեղեցիկ վայր՝ երևանցիների համար: Այս մասին գրել է Երևանի քաղաքապետրանը և հայտնել, որ. «Այսօր արդեն այգում սկսել ենք սանիտարական մաքրման ծավալուն աշխատանքներ»:

«Փխրեցվում է հողը, ավելացվում է հողախառնուրդ՝ գարնանը տունկ իրականացնելու նպատակով: Այգին կապահովվի նաև ոռոգման համակարգով»,- նշված է գրառման մեջ: 

Աշխատանքային հերթական խորհրդակցության ժամանակ քաղաքապետ Տիգրան Ավինյանը հանձնարարել է սկսել այգին մաքրելու գործընթացը։ Այն հետագայում կբարեկարգվի ու կկանաչապատվի:

«Մենք պետք է ուսումնասիրենք բոլոր այն առաջարկությունները, որոնք ունեցել ենք այգու վերակառուցման, կանաչապատման և մնացյալ ամենի մասին։ Հավանաբար, հենց այս շաբաթ մի քննարկում կանցկացնենք և կշարժվենք առաջ։ Շատ ուրախ եմ, որ իրավական բոլոր հարցերը վերջապես լուծվել են։ Շնորհակալություն եմ հայտնում այս գործընթացի բոլոր մասնակիցներին։ Կոնսերվատորիայի այգին Երևան քաղաքի ամենակարևոր այգիներից մեկն է, որը, սակայն, գտնվում է շատ վատ վիճակում»,- ասել է Ավինյանը։