Էրդողանը կարող է օգնել ավարտել Ռուսաստանի պատերազմը Ուկրաինայի դեմ. Թրամփ
ԱՄՆ նախագահ Դոնալդ Թրամփը հայտարարել է, որ Թուրքիայի նախագահ Ռեջեփ Թայիփ Էրդողանը կարող է օգնել ավարտել Ռուսաստանի պատերազմը Ուկրաինայի դեմ։
Պետության ղեկավարը ճեպազրույց է անցկացրել Air Force One ինքնաթիռում, որն օգտագործել էր Մերձավոր Արևելք կատարած այցից հետո Վաշինգտոն վերադառնալու համար։
Լրագրողները նրան հարցրել են, թե արդյոք Թուրքիայի ղեկավարը կարող է օգնել ավարտել Ռուսաստանի և Ուկրաինայի միջև պատերազմը։
«Այո, Էրդողանը կարող է։ Ռուսաստանը հարգում է նրան։ Ուկրաինայի վերաբերյալ չեմ կարող ասել, բայց Պուտինը հարգում է նրան։ Եվ նա իմ ընկերն է։ Գիտեք, կարող եք հասկանալ, թե ինչու. ես լավ եմ շփվում ուժեղ մարդկանց հետ։ Ես չեմ շփվում թույլ մարդկանց հետ։ Ես լավ եմ շփվում ուժեղ մարդկանց հետ։ Չգիտեմ, թե ինչու», - ասել է Թրամփը։
Նա նաև հավելել է, որ Թուրքիայի նախագահը լավ է վերաբերվում իրեն։
«Գիտեք, երբ ՆԱՏՕ-ն խնդիրներ է ունենում Էրդողանի հետ, ինչը հաճախ է պատահում, նրանք զանգահարում են ինձ և խնդրում են խոսել Էրդողանի հետ։ Եվ ես երբեք չեմ ձախողվել. ամեն ինչ լուծվում է բառացիորեն անմիջապես», - ասել է պետության ղեկավարը։
