Իրանը երբեք միջուկային զենք չի ձեռք բերի. ԵՄ եռյակի երկրներ

ԵՄ եռյակի երկրները՝ Մեծ Բրիտանիան, Ֆրանսիան և Գերմանիան, հայտարարել են Թեհրանի և Վաշինգտոնի հետ Իրանի միջուկային ծրագրի շուրջ բանակցությունները վերսկսելու իրենց պատրաստակամության մասին։

«Իրանի միջուկային ծրագիրը լուրջ սպառնալիք է ներկայացնում համաշխարհային խաղաղության և անվտանգության համար։ Մենք վճռական ենք վերսկսել բանակցությունները Իրանի և Միացյալ Նահանգների հետ՝ համապարփակ, երկարատև և ստուգելի համաձայնագրի հասնելու համար, որը կապահովի, որ Իրանը երբեք միջուկային զենք չի ձեռք բերի։ Մենք կոչ ենք անում ՄԱԿ-ի բոլոր անդամ պետություններին հետևել նոր կիրառված սահմանափակումներին», - ասվում է ԵՄ3-ի համատեղ հայտարարության մեջ, որը տարածել է Մեծ Բրիտանիայի վարչապետ Քեյր Սթարմերի գրասենյակը։

Հիշեցնենք՝ ավելի վաղ Մեծ Բրիտանիան, Ֆրանսիան և Գերմանիան ՄԱԿ-ի Անվտանգության խորհրդին տեղեկացրին 2015 թվականի միջուկային համաձայնագրով չեղարկված Իրանի դեմ միջազգային պատժամիջոցները վերականգնելու մեխանիզմի գործարկման մասին: Դրանից հետո համաշխարհային կազմակերպության Անվտանգության խորհուրդը մերժեց Իրանի դեմ պատժամիջոցները չերկարաձգելու մասին բանաձևի նախագիծը, որի արդյունքում Անվտանգության խորհրդի սահմանափակումները վերականգնվեցին սեպտեմբերի 28-ին: