Չկա նույնիսկ մեկ ստորակետ, որը չենք կարող հիմնավորել․ Մամիջանյան
Ես առաջին անգամ եմ այս հանձնաժողովում նախագիծ ներկայացնում։ Բայց եթե պատրաստ եք իմ հետ մտնել բովանդակային քննարկման մեջ ազգային ճգնաժամի և կառավարման ձախողման մասին վերտառությամբ հոդվածի վերաբերյալ՝ ես այսօր ամբողջ օրս կազատեմ և մեծ սիրով դրան կտրամադրեմ։ Բայց դժբար թե դուք նման բան անեք։ Այս մասին ՀՀ ԱԺ պետաիրավական մշտական հանձնաժողովի նիստում ասել է «Պատիվ ունեմ» խմբակցության ղեկավար Հայկ Մամիջանյանն՝ անդրադառնալով ՔՊ-ական պատգամավոր Ալխաս Ղազարյանի դիտարկմանը, թե անմաստ կլինի Նիկոլ Փաշինյանին անվստահություն հայտնելու նախագծի մեջ բովանդակային քննարկման մեջ մտնել, եթե նախագիծը միևնույն է՝ գնալու է լիագումար։
Հանձնաժողովի նախագահ Վլադիմիր Վարդանյանն էլ ասել է, որ եթե կարիք լինի՝ պետք է ամբողջ օրը մնալ և հանձնաժողովի նիստում քննարկել հարցը։ «Մենք պատրաստ ենք ու որևէ կերպ դրանից չենք խորշում»,-ասել է Վարդանյանը։
Ալխաս Ղազարյանն էլ պնդել է, որ բովանդակային քննարկման կարիք չկա, քանի որ ներկայացված նախագիծը նման է շարադրության։ «Այսինքն, կանխատեսելի էր, որ տանելու ենք լիագումար, այսինքն, քննարկման կարիք չկա»։
Մամիջանյանն էլ արձագանքել է, որ ճիշտ կլինի դպրոցական ձևակերպումներից զերծ մնալ, որպեսզի չսկսի ՔՊ-ի ներկայացրած նախագծերը քննարկել։ «Եթե կարող եք նման վերտառությամբ նախագծի շուրջ բովանդակային քննարկման մեջ մտնել՝ ես սիրով կազատեմ իմ ամբողջ օրվա գրաֆիկը և ամբողջ օրը ձեր հետ բովանդակային կքննարկեմ։ Վստահեցնում եմ, այս հայտարարության մեջ չկա, նույնիսկ մեկ ստորակետ, որը չենք կարող հիմնավորել»,-ասաց Մամիջանյանը։
