Կարևոր է, որ կուսակցությունը լինի ամենաթափանցիկ գործող համակարգը. վարչապետ
Քաղաքական համակարգի կայացման առումով շատ կարևոր է, որ կուսակցությունը լինի ամենաթափանցիկ գործող համակարգը, և մենք պետք է այդ որոշումը կայացնենք, ԱԺ ամբիոնից հայտարարեց վարչապետ Նիկոլ Փաշինյանը՝ արձագանքելով հարցին, թե ճիշտ չի լինի՞ արդյոք, որ կուսակցություններում վարչությունների կազմերը լինեն ընտրովի, այնպես՝ ինչպես ՔՊ-ում։
«Հայաստանի կուսակցությունները 90 տոկոսով վարչության կամ ղեկավար մարմնի կազմը 1-2 հոգի են գրում, հետո մարդիկ մամուլից են իմանում, թե ինչ եղավ, որտեղից ընտրվեց։ Մենք ժողովրդավար երկիր ենք, պետք է գտնենք մեխանիզմներ, որ մեր երկրում գործող կուսակցությունները նույնպես համապատասխանեն ժողովրդավարության և թափանցիկության կանոններին»,-ասաց Փաշինյանը։
Նա նշեց, թե դա կարող է ընդհուպ ընտրություններին մասնակցել-չմասնակցելու հնարավորություն տալ-չտալու հարց առաջացնել.
«Կոնսպիրատիվ կառույցները ինչո՞ւ են ընտրություններին մասնակցում, թող գնան, զբաղվեն կոնսպիրացիայով, մենք էլ իրենց բացահայտենք»։
