Լեբեդևը վստահ է, որ Հայաստանը չի դադարեցնի մասնակցությունը ԱՊՀ–ին
Անկախ պետությունների համագործակցության (ԱՊՀ) գլխավոր քարտուղար Սերգեյ Լեբեդևը Մինսկում ԱՊՀ կառավարությունների ղեկավարների խորհրդի նիստին Հայաստանի հեռավար մասնակցության կապակցությամբ հայտարարել է` մտավախություն չկա, որ կառույցին անդամակցող որևէ երկիր ցանկանում է դադարեցնել իր ակտիվությունը:
«Հայաստանի ներկայացուցիչ, փոխվարչապետ Գրիգորյանը ելույթ է ունեցել տեսակապի ձևաչափով, բայց գործնական խոսքով։ Մենք ոչ մի կասկած չունենք, որ որևէ անդամ պետություն ցանկանում է դադարեցնել ԱՊՀ–ի շրջանակներում իր գործունեությունը։ Բոլոր ելույթ ունեցողները խոսել են կազմակերպության պահպանման կարևորության, տնտեսական համագործակցության՝ որպես մեր փոխգործակցության գերակա ուղղության մասին», - Մինսկում լրագրողներին ասել է Լեբեդևը։
Նա նշել է, որ Հայաստանը հավանություն է տվել օրակարգային փաստաթղթերի մեծ մասին։
ԱՊՀ երկրների կառավարությունների ղեկավարները Բելառուսի մայրաքաղաքում կայացած նիստում հաստատել են 25 փաստաթուղթ, որոնք անհրաժեշտ են համագործակցության շրջանակներում ինտեգրացիայի ընդլայնմանը:
