Նոր համաձայնագիր` Թեհրանի և ՄԱԳԱՏԷ-ի միջև
Իրանի Գերագույն ազգային անվտանգության խորհուրդը (ԱԳԽ) հաստատել է Թեհրանի և ԱԷՄԳ-ի միջև համագործակցության նոր համաձայնագիրը, որը ստորագրվել է գործակալության գլխավոր տնօրեն Ռաֆայել Գրոսիի և արտաքին գործերի նախարար Աբբաս Արաղչիի կողմից Կահիրեում։
«Համաձայնագրի կետերի տեքստը վերանայվել է Գերագույն ազգային անվտանգության խորհրդի միջուկային կոմիտեի կողմից, և ստորագրված ամեն ինչ, ըստ էության, հաստատվել է այս կոմիտեի կողմից», - հայտարարության մի հատված է մեջբերում NourNews-ը։ Ինչպես նշված է փաստաթղթում, կոմիտեն լիազորված է գործել և որոշումներ կայացնել ԱԳԽ-ի անունից այս հարցում։
Հիշեցնենք` հունիսի 25-ին Իրանի խորհրդարանի անդամները հաստատել են Իսլամական Հանրապետության և ԱԷՄԳ-ի միջև համագործակցությունը կասեցնելու մասին օրինագծի տեքստը։ Հուլիսի 2-ին Իրանի նախագահ Մասուդ Պեզեշկիանը ստորագրել է օրենքը։ Իրանի արտաքին գործերի նախարար Աբբաս Արաղչին, իր հերթին, նշել է, որ նոր օրենքը պարզաբանում է ԱԷՄԳ-ի հետ համագործակցության շրջանակը, բայց ամբողջությամբ չի փակել փոխգործակցության ուղիները և այս հարցի վերաբերյալ որոշումը թողել է երկրի Գերագույն ազգային անվտանգության խորհրդի հայեցողությանը։
Նշենք նաև, որ սեպտեմբերի 9-ին Իրանը և ԱԷՄԳ-ն Եգիպտոսում համաձայնագիր ստորագրեցին համագործակցությունը վերսկսելու մասին, որը կասեցվել էր Իսրայելի և ԱՄՆ-ի կողմից հունիսյան հարձակումներից հետո, քանի որ ԱԷՄԳ-ի կողմից միջուկային օբյեկտների վրա հարձակված երկրների նկատմամբ դատապարտման բացակայությունը քննադատության արժանացել է Իրանում: Ինչպես փաստաթղթի ստորագրումից հետո բացատրել է Իրանի արտգործնախարարը, Թեհրանի և գործակալության միջև համագործակցության նոր կանոնակարգերը լիովին բավարարում են երկու կողմերի պահանջները: Սակայն, եթե Իսլամական Հանրապետության դեմ որևէ թշնամական գործողություն վերսկսվի, ԱԷՄԳ-ի հետ բոլոր շփումները կդադարեցվեն, հավելել է նա:
