Սրբազան շարժման բոլոր թեզերը սուտ են դուրս եկել. Ալեքսանյան

Պարոն Դանիելյան, Ոսկեպարի եկեղեցին Հայաստանում է, սահմանազատված, սահմանից էս կողմ՝ մեր կողմ: Մնացած ամեն ինչը լիրիկա է: Հիմա թե ոնց է եղել, ոնց չի եղել, դուք ինչ նկատի ունեիք, երբ ասում էիք՝ դրա ընթացքում ինչ է եղել, մենք ասել ենք՝ Ոսկեպարի եկեղեցին մնալու է մեր կողմում, դուք ասում էիք՝ Ոսկեպարի եկեղեցին հանձնում ենք: Այս մասին ԱԺ ամբիոնից պատասխանելով ընդդիմադիր պատգամավոր Գառնիկ Դանիելյանի մեղադրանքներին՝ հայտարարել է ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը:

«Ոսկեպարի եկեղեցին մնաց մեր կողմում, չհանձնվեց, ձեր ասածը դուրս եկավ սխալ, մեր ասածը՝ ճիշտ»,- ընդգծել է պատգամավորը, ինչին ի պատասխան՝ Դանիելյանը հակադարձել է իր տեղից:

«Դուք ազատ եք հավատալ նրան, որ դա եղել է ձեր պայքարի արդյունքում: Թույլ տվեք ես էլ, օգտվելով իմ իրավունքից, մտածել, որ դա այդքան էլ այդպես չէ»,- ասել է Ալեքսանյանը, որի խոսքերին ի պատասխան՝ Դանիելյանը դուրս է եկել ԱԺ նիստերի դահլիճից:

ՔՊ խմբակցության պատգամավորի խոսքով՝ իրականությունն այն է, որ Ոսկեպարի եկեղեցին մնացել է Հայաստանի սահմանազատված սահմանից ներս, իսկ այսպես կոչված «Սրբազան շարժման» բոլոր թեզերը սուտ են դուրս եկել:

Անդրադառնալով ընդդիմադիր պատգամավորի մեղադրանքներին՝ կապված 2018 թվականից հետո իշխանության քաղաքականության փոփոխության հետ, ընդգծել է՝ իրենք իրենց սխալները ամենաշատն են խոստովանել, դրանք հասկացել են ու բարձրաձայնել:

«Մենք ինքներս ներողություն ենք խնդրել մեր հանրությունից: Մենք հո դուք չենք, մենք մարդ ենք, գիտենք, որ սխալական ենք, գիտենք, որ այդ սխալները կարող են հետևանքներ ունենալ ու ունեցել են, ցավոք»,- ասաց Ալեքսանյանը՝ դիմելով ընդդիմադիր պատգամավորներին: