ԼՈՒՍԱՆԿԱՐՆԵՐ. Աննա Հակոբյանն Արցախից լուսանկարներ է հրապարակել

ՀՀ վարչապետի տիկին Աննա Հակոբյանն Արցախից լուսանկարներ է հրապարակել՝ կից նշելով. 

«Փառք մեր ժողովրդին, 
Փառք մեր զինվորներին, 
Փառք մեր վետերաններին, 
Փառք մեր պետականությանը: 

Շնորհավոր Եռատոն»: 
 

[86b700bf9b15bac625a69768efad7686.jpg]

[0de2976650b0aa6db97304b55f7dd068.jpg]

Նշենք, որ վարչապետ Նիկոլ Փաշինյանը տիկնոջ` Աննա Հակոբյանի հետ ժամանել է Արցախի Հանրապետություն, որտեղ մասնակցել է եռատոնին` Հայրենական մեծ պատերազմում հաղթանակի, ԱՀ պաշտպանության բանակի կազմավորման և Շուշիի ազատագրման օրվան նվիրված միջոցառումներին: Ստեփանակերտի օդանավակայանում վարչապետին և նրա տիկնոջը դիմավորել են ԱՀ գործող նախագահ Բակո Սահակյանը և ԱՀ ընտրված նախագահ Արայիկ Հարությունյանը` տիկնանց հետ: Հայաստանի և Արցախի բարձրաստիճան պաշտոնյաներն այցելել են Ստեփանակերտի հուշահամալիր, որտեղ ծաղկեպսակներ ու ծաղիկներ են դրել Հայրենական մեծ պատերազմում և Շուշիի ազատագրման ժամանակ զոհված ազատամարտիկների հիշատակը հավերժացնող հուշարձանին: ՀՀ վարչապետն ու տիկին Հակոբյանն այնուհետև այցելել են հուշահամալիրի հարևանությամբ գտնվող Արցախյան գոյամարտում զոհված ազատամարտիկների եղբայրական գերեզմանատուն, ծաղիկներ դրել շիրիմներին` հարգանքի տուրք մատուցելով ազատամարտիկների հիշատակին: Այնուհետև երկու հայկական հանրապետությունների բարձրաստիճան պաշտոնյաները ծաղիկներ են դրել Շուշիի Տանկ-հուշարձանին, սպարապետ Վազգեն Սարգսյանի հուշարձանին՝ հարգելով նրա հիշատակը: 
Տոնական միջոցառումների ավարտից հետո Աննա Հակոբյանն առանձին հանդիպում է ունեցել Արցախի Հանրապետության նախագահ Բակո Սահակյանի տիկնոջ՝ Անահիտ Սահակյանի, Արցախի Հանրապետության նորընտիր նախագահ Արայիկ Հարությունյանի տիկնոջ՝ Քրիստինե Հարությունյանի, ՀՀ ԱԺ նախագահ Արարատ Միրզոյանի տիկնոջ՝ Գոհար Աբաջյանի և ԱՀ ԱԺ նախագահ Աշոտ Ղուլյանի տիկնոջ Լիանա Ղուլյանի հետ։ 
 

[f54fb219e854da64bc61eba03271efab.jpg]

[f0249c043fe9d40f8a6b6714483413c1.jpg]

[075bff4772b5412283ca79a56b44abeb.jpg]

[7a8d41116d60935353bc6d131bc085da.jpg]

[8c1e8c33306f68716d69e48c3606394d.jpg]