Երևանում գրանցվել են հանցագործության ամենաշատ դեպքերը․ որոնք են հաջորդում մայրաքաղաքին

2025 թվականի հունվար-հուլիս ամիսների ընթացքում ՀՀ-ում գրանցվել է 24.473 հանցագործության դեպք, որոնցից 11.408-ը ոչ մեծ ծանրության են, 8564-ը միջին ծանրության, 3090-ը ծանր, իսկ 1411-ն առանձնապես ծանր։ Այս մասին «Փատսինֆո»-ն տեղեկացել է ՀՀ վիճակագրական կոմիտեի հրապարակած տվյալներից։

Նշված ժամանակահատվածում մարդու (անձի) դեմ ուղղված հանցագործությունների թիվը կազմել է 3902-ը, որոնցից 1085-ը սպանության դեպքեր են, իսկ միայն 44-ն է սպանության փորձ։

Ուշագրավ է, որ հանցագործության 3902 դեպքերից 586-ն ուղարկվել է դատարան (այդ թվում՝ նախորդ տարիներից գրանցված հանցագործություններից), իսկ 357 դեպք կարճվել է, այդ թվում՝ նախորդ տարիներից գրանցված հանցագործություններից։

Հասարակական անվտանգության, հասարակական կարգի և բնակչության առողջության դեմ ուղղված հանցագործությունների թիվը նույն ժամանակահատվածում կազմել է 9876-ը, հրազեն, ռազմամթերք պատրաստելու և ապօրինի շրջանառության՝ 704, ճանապարհային երթևեկության և տրանսպորտային միջոցների շահագործման կանոնների խախտման 1042 դեպք։ Նշենք, որ ճանապարհային երթևեկության և տրանսպորտային միջոցների շահագործման կանոնների խախտման 1042 դեպքերից 99-ը մահվան ելքով են։

Առաջին կիսամյակում գրանցվել է խուլիգանության 573 դեպք, որից 73-ը կատարվել է զենքի գործադրմամբ։ Թմրամիջոցների հետ կապված հանցագործությունների թիվը ևս ապշեցնող է այդ ժամանակահատվածում։ Հունվար-հուլիսին գրանցվել է 2161 թմրամիջոցների հետ կապված հանցագործությունների դեպք։

Սեփականության դեմ ուղղված հանցագործությունների թիվը նույն ժամանակահատվածում կազմել է 6453-ը, որոնցից 5285-ը գույքի հափշտակությունների դեպքեր են, 3607-ը՝ գողության, իսկ 1373-ը խարդախության դեպքեր են։

Ընդհանուր ՀՀ-ում գրանցված հանցագործությունների քանակը 2025 թվականի հունվար-հուլիս ամիսների ընթացքում կազմել է 24.473-ը։ Մայրաքաղաք Երևանն առաջատարն է տվյալ ժամանակահատվածում հանցագործության ամենաշատ կատարված դեպքերով, որը կազմում է 12.328-ը, որից 5707-ը ոչ մեծ ծանրության են, 4302-ը՝ միջին ծանրության, 1594-ը՝ ծանր, 725-ը՝ առանձնապես ծանր։

Արարատի մարզը կատարված հանցագործությունների թվով երկրորդն է. այստեղ գրանցվել է 1920 հանցագործության դեպք, որից 959-ը ոչ մեծ ծանրության է, 580-ը՝ միջին ծանրության, 165-ը՝ ծանր, իսկ 216-ը՝ առանձնապես ծանր։

Կոտայքի մարզում նշված ժամանակահատվածում կատարված հանցագործությունների թիվը կազմում է 1877-ը, որից 988-ը ոչ մեծ ծանրության է, միջին ծանրության՝ 627-ը, ծանր՝ 218-ը, առանձնապես ծանր՝ 44-ը։

Արմավիրի մարզում գրանցված հանցագործությունների քանակը կազմել է 1664-ը, Շիրակի մարզում՝ 1448-ը, Լոռում՝ 1416-ը։

Հանցագործության ամենաքիչ դեպքերը գրանցվել են՝ Գեղարքունիքում (991), Արագածոտնում (844), Սյունիքում (741), Վայոց ձորում (378), Տավուշում (866)։