Իրանի ԱԳՆ-ն՝ Ռուսաստանի և Չինաստանի հետ միջուկային ծրագրի շուրջ ունեցած կապերի մասին
Թեհրանը պահպանում է կապը Մոսկվայի և Պեկինի հետ Իրանի միջուկային ծրագրին վերաբերող հարցերի շուրջ։ Այս մասին հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային, փոխանցում է «ՏԱՍՍ»-ը։
«Պահպանելով կապերը Չինաստանի և Ռուսաստանի հետ, որոնք Համատեղ համապարփակ գործողությունների ծրագրի կողմեր են և ՄԱԿ-ի Անվտանգության խորհրդի մշտական անդամներ, մենք նաև բանակցություններ ենք վարել և վարում ենք երեք եվրոպական երկրների հետ», - ասել է Էսմայիլ Բաղային։
Դիվանագետը հավելել է, որ այս բանակցություններում Թեհրանի նպատակն է «ապահովել, որ ազգային շահերը հարգվեն»։
Հավելենք՝ Ժնևում փոխարտգործնախարարների մակարդակով տեղի կունենան Իրանի և «եվրոպական եռյակի» (Մեծ Բրիտանիա, Գերմանիա և Ֆրանսիա) միջև բանակցություններ՝ հակաիրանական պատժամիջոցների վերացման և իրանական միջուկային ծրագրի շուրջ առկա տարաձայնությունների լուծման հարցերի շուրջ։
