Կանտը խորիմաստ գնահատական է տվել հայ ժողովրդին. Լևոն Տեր-Պետրոսյան
Առաջին նախագահ Լևոն Տեր-Պետրոսյանը Facebook-ի իր էջում գրառում է արել հիշեցնելով Իմանուիլ Կանտի գնահատականը հայերի մասին։
Նա, մասնավորապես, գրել է. «Իմանուիլ Կանտը հայերի մասին
Հայ պատմաբաններից և փիլիսոփաներից շատերն, անշուշտ, գիտեն այն մասին, որ 18-19-րդ դարերի (1724–1804 թթ.) գերմանացի հռչակավոր փիլիսոփա Իմանուիլ Կանտը խորիմաստ գնահատական է տվել հայ ժողովրդին։ Իրապես դա այնպիսի մի պատվաբեր գնահատական է, որը պարտավոր է գիտենալ յուրաքանչյուր կրթված հայ։ Ուստի պարտքս եմ համարում մեր հանրությանը ներկայացնել Կանտի «Մարդաբանությունը պրագմատիկ տեսանկյունից» գրքի հայերին վերաբերող հատվածը՝.
«Քրիստոնյա մի այլ ժողովրդի՝ հայերի մոտ տիրում է առևտրական ոգու մի յուրահատուկ շնորհ։ Նրանք հետիոտն ճանապարհորդելով Չինաստանի սահմաններից մինչև Գվինեական ափի Կորսո հրվանդան զբաղվում են ապրանքափոխանակությամբ։ Դա վկայությունն է այդ իմաստուն և աշխատասեր ժողովրդի յուրահատուկ ծագման՝ ժողովուրդ, որը Հյուսիս-Արևելքից շարժվելով դեպի Հարավ-Արևմուտք կտրում-անցնում է համարյա ամբողջ Հին Աշխարհը և ունակություն դրսևորում արժանանալու բոլոր այն ժողովուրդների սիրալիր հյուրընկալությանը, որոնց մոտ նրանք հանգրվանում են։ Դա ապացուցում է նրանց բնավորության գերազանցությունը (որի ձևավորման նախասկիզբը մենք այլեւս չենք կարող ուսումնասիրել)»,- գրել է Առաջին նախագահ Լևոն Տեր-Պետրոսյանը։
