Թրամփը Պուտինին կոչ է արել ներկայացնել իրատեսական պահանջներ. Axios

Թրամփը համաձայնել է Զելենսկու հետ այն հարցում, որ Ռուսաստանի և Ուկրաինայի նախագահները պետք է անմիջականորեն քննարկեն տարածքային հարցը և խնդրել է Պուտինին ներկայացնել իրատեսական պահանջներ, գրում է Axios-ը։

Գործակալությունը՝ հղում անելով իր աղբյուրներին, փոխանցում է.

«ԱՄՆ նախագահ Դոնալդ Թրամփը հեռախոսազրույցի ժամանակ Ռուսաստանի նախագահ Վլադիմիր Պուտինին ասել է, որ անհրաժեշտ է անմիջական հանդիպում ունենալ Ուկրաինայի նախագահ Վլադիմիր Զելենսկիի հետ՝ տարածքային պահանջները քննարկելու համար, և խնդրել է նրան «իրատես» լինել»,- ասվում է հոդվածում: 

Հրատարակությունը պարզել է, որ ստեղծվել է ԱՄՆ-ի, Եվրոպայի և Ուկրաինայի համատեղ հանձնաժողով՝ Կիևի անվտանգության երաշխիքներ մշակելու համար, որը գլխավորում է պետքարտուղար Մարկո Ռուբիոն։ Աղբյուրի փոխանցմամբ՝ հանձնաժողովի անդամները առաջիկա օրերին կաշխատեն «առավոտից մինչև երեկո», և շաբաթվա վերջում «կարող է ի հայտ գալ որոշակի հստակ կառուցվածք»։