ԵԽ գլխավոր քարտուղարը՝ Ադրբեջանի և Հայաստանի միջև նախաստորագրված համաձայնագրի մասին

Եվրոպայի խորհրդի գլխավոր քարտուղար Ալեն Բերսեն ողջունել է Վաշինգտոնում Հայաստանի և Ադրբեջանի կողմից խաղաղության համաձայնագրի նախաստորագրումը:

Ըստ պաշտոնյայի՝ այն ճանապարհ է հարթում դեպի երկու երկրների միջև երկարատև հակամարտության վերջնական կարգավորում։

«Ես ողջունում եմ երկու երկրների առաջնորդներին և քաղաքացիներին արդար և տևական խաղաղության ուղղությամբ իրենց ցուցաբերած քաղաքական կամքի, համառության և խիզախության համար։ Տասնամյակներ տևած անվստահության, տարածքային վեճերի և մարդասիրական մարտահրավերների հաղթահարումը պահանջում է դժվար, բայց անհրաժեշտ փոխզիջումներ բոլոր կողմերից»,- նշել է նա։

«Կոչ ենք անում երկու երկրներին էլ անել առավելագույնը՝ շարունակելու առաջ շարժվել խաղաղության ուղղությամբ՝ ոչ միայն վստահությունը, կապը և ենթակառուցվածքները վերակառուցելու, այլև մեր հիմնական արժեքները՝ ժողովրդավարությունը, մարդու իրավունքները և օրենքի գերակայությունն ակտիվորեն ամրապնդելու համար, այդ թվում՝ Մարդու իրավունքների եվրոպական դատարանի որոշումները լիարժեք և արդյունավետ իրականացնելու միջոցով»,- ի թիվս այլնի՝ ասված է հայտարարության մեջ։