Գագաուզիայի ղեկավարը դատապարտվեց 7 տարով

Քիշնևի շրջանային դատարանը Գագաուզիայի (Մոլդովայի կազմում գտնվող ինքնավարություն) ղեկավար Եվգենյա Գուցուլին յոթ տարվա ազատազրկման դատապարտեց Մոլդովայում արգելված «Շոր» կուսակցության ֆինանսավորման հետ կապված գործով։ Այս մասին հայտնել է փաստաբան Նատալյա Բայրամը։

«Գուցուլը դատապարտվեց յոթ տարվա ազատազրկման՝ պատժի անհապաղ կրմամբ. նրան դատարանի դահլիճից անմիջապես բանտ կտեղափոխեն», – ասել է Բայրամը։

Գագաուզիայի ղեկավար Եվգենյա Գուցուլը և նրա համակիր Սվետլանա Պոպանը, որը նույնպես մեղավոր է ճանաչվել, կալանավորվել էին դատարանի դահլիճում։

Հիշեցնենք` Գուցուլը ձերբակալվեց մարտի 25-ին Քիշնևի օդանավակայանում, ապա կալանավորվեց 20 օրով։ Դատախազությունը Գագաուզիայի ղեկավարին մեղադրում է «Շոր» կուսակցությանը ֆինանսավորելու մեջ, որը հանրապետությունում հակասահմանադրական է ճանաչվել։ Ի սկզբանե դատարանը որոշել էր, որ Գուցուլը պետք է կալանքի տակ մնա մինչև ապրիլի 14-ը, սակայն ապրիլի 9-ին խափանման միջոցը փոխարինվեց 30-օրյա տնային կալանքով։