ՄՊՀ–ն շարունակում է ուսումնասիրել հեղուկ գազի շուկան

ՀՀ մրցակցության պաշտպանության հանձնաժողովը դեռ շարունակում է ուսումնասիրել հեղուկ գազի շուկան, այս պահին վարույթ դեռ չկա։ Այս մասին Sputnik Արմենիայի հետ զրուցում նշել են հանձնաժողովից։

Նշվում է, որ ավելի քան 100 գազատար մեքենա մնացել է Վրաստանում և չի կարողանում հատել հայ–վրացական սահմանը, ինչը հանգեցրել է գազի գների կտրուկ աճի։ Հեղուկ գազի գինը կարճ ժամանակում 120 դրամից հասավ 170–180 դրամի։

Այժմ հեղուկ գազի գինը հասել է 200 դրամի։ Հուլիսի 18–ին ՄՊՀ–ն հայտարարել էր, որ ուսումնասիրություն է սկսել հեղուկ գազի շուկայում, ինչի մասին նախապես տեղեկացված են եղել նաև գործընկերները:

ՄՊՀ–ից նաև հայտնել են, որ հեղուկ գազի շուկայի ուսումնասիրությունը կարող է տևել մոտ մեկ ամիս, քանի որ շուկայի տնտեսվարողները մոտ 90 են: Այս պահին հարցումների փուլն է։

Թեմային անդրադառնալով` ՀՀ էկոնոմիկայի նախարար Գևորգ Պապոյանը «Ֆեյսբուքի» օգտատերերից մեկի հարցին ի պատասխան այսօր գրել է, որ խնդիրը մրցակցության պաշտպանության հանձնաժողովի քննարկման տիրույթում է:

Օգտատերը նախարարին հիշեցրել է, որ արդեն 15 օր է՝ հեղուկ գազը նորմալ հասնում է Հայաստան, բայց գազալցակայանների սեփականատերերը բարձրացնում են դրա գինը, իսկ պետությունը չի ցանկանում կամ չի անում ոչինչ` ազդելու այս գործելոճի վրա։