Լոս Անջելեսում ոստիկանը կրակել է լուսանկարչի գլխին

Լոս Անջելեսում բողոքի ակցիաների ժամանակ ոստիկանը ռետինե գնդակով կրակել է New York Post թերթի լուսանկարչի գլխին։ Արդյունքում տղամարդը հայտնվել է հիվանդանոցում։ Սա արդեն երկրորդ նման դեպքն է: Այս մասին գրում է New York Post-ը։

Նշվում է, որ Թոբի Կանհեմը տեսանկարահանել է ոստիկանների և ցուցարարների միջև տիրող քաոսը, երբ Կալիֆոռնիայի ճանապարհային պարեկային ծառայության սպան հանկարծ զենքը շրջել է նրա վրա և կրակել մոտ 90 մետր հեռավորությունից:

Հիշեցնենք՝ ԱՄՆ իշխանությունները հաստատել են Լոս Անջելես շուրջ 700 ծովային հետևակայինների տեղակայման որոշումը՝ ի լրումն արդեն ուղարկված Ազգային գվարդիայի ուժերի: Ծովային հետևակայինների տեղակայումը տեղի է ունենում միգրացիոն ծառայության աշխատակիցների հետ տեղի ունեցած բախումների ֆոնին։

Բացի այդ, քաղաք են ուղարկվում ևս 2,000 Ազգային գվարդիական։ Կալիֆոռնիայի իշխանությունները անօրինական են համարել Ազգային գվարդիայի տեղակայման որոշումը և դատական հայց են ներկայացրել Դոնալդ Թրամփի վարչակազմի դեմ։