Ավինյանը խոսել է Տիգրան Տեր-Մարգարյանի հրաժարականի մասին
Տիգրան Տեր-Մարգարյանը հրաժարական է տվել և, կարծում եմ, շատ համաչափ և համադրելի քաղաքական պատասխանատվություն է եղել: Այս մասին հայտնել է Երևանի քաղաքապետն՝ անդրադառնալով Նոր-Նորքի թաղապետի հրաժարականի մասին հարցին։
«Քաղաքական ընդդիմախոսները թող առաջին հերթին զսպեն իրենց տոնայնությունը, որովհետև իրենք շատ վտանգավոր տոնայնությամբ են խոսում, և դա բերում է նման միջադեպերի։ Ես մեր բոլոր գործընկերներին զգուշացրել եմ, որ ընդդիմախոսները պարբերաբար գնում են սադրանքների։ Այնուամենայնիվ, ես չեմ կարող իրենց ամեն մի սադրանքի համար պատասխան տալ։ Մենք պետք է հասկանանք՝ դիմացի կողմը ի՞նչ է անում, որ անընդհատ հանգում ենք նմանատիպ իրավիճակների։ Ես միջադեպից ուղիղ 1 օր առաջ ասել էի, որ նմանատիպ պահվածքով, վտանգավոր սադրանքներով լավ տեղ չենք հասնելու։ Հաջորդ օրը տեղի ունեցավ սադրանքը, և ունեցանք այդ միջադեպը, որի համար շատ ցավում եմ»։
Ավինյանը նաև նշել է, որ բռնությունն անընդունելի է, անկախ ամեն ինչից պաշտոնյաները պետք է զսպվածություն ցուցաբերեն և չտրվեն սադրանքներին։
Ավելի վաղ հայտնել էինք, որ Նոր Նորք վարչական շրջանի ղեկավար Տիգրան Տեր-Մարգարյանը դադարեցնում է իր լիազորությունները:
Հիշեցնենք` տեղեկացրել էինք, որ Նոր Նորք վարչական շրջանի թաղապետարանում ծեծկռտուք է տեղի ունեցել թաղապետարանի աշխատակիցների և ակտիվիստ Արթուր Չախոյանի միջև։
