Այդ հարցը կլուծենք ռազմական ճանապարհով, եթե այլ տարբերակ չլինի. Հեգսեթ

ԱՄՆ նախագահ Դոնալդ Թրամփը լրջորեն տրամադրված է թույլ չտալ, որ Իրանը ձեռք բերի միջուկային զենք։ Այս մասին Fox News-ին տված հարցազրույցում ասել է ԱՄՆ պաշտպանության նախարար Փիթ Հեգսեթը։

«Թրամփը վճռական է՝ Իրանը չպետք է ունենա միջուկային զենք։ Եվ եթե այդ հարցը հնարավոր չլինի լուծել բանակցությունների ճանապարհով, ապա մենք ունենք նաև այլ տարբերակներ, այդ թվում՝ ռազմական», – ասել է Հեգսեթը։

Նրա խոսքով՝ ԱՄՆ-ն հույս ունի, որ ռազմական սցենարի անհրաժեշտություն չի առաջանա։ Նա նշել է, որ ապրիլի 12-ին Օմանում կայացած Վաշինգտոնի և Թեհրանի ներկայացուցիչների անուղղակի բանակցությունները եղել են արդյունավետ։

Բանակցությունները վերաբերել են Իրանի միջուկային ծրագրի շուրջ լարվածության հաղթահարմանը։ Իրանի կողմից բանակցություններին մասնակցել է արտաքին գործերի նախարար Աբաս Արաքչին, ԱՄՆ կողմից՝ նախագահի հատուկ ներկայացուցիչ Սթիվեն Ուիթքոֆը։ Կողմերը քննարկումները շարունակելու պայմանավորվածություն են ձեռք բերել։

Երկրորդ փուլը կկայանա ապրիլի 19-ին։