Արցունքաբեր գազ և տասնյակ տուժածներ՝ Համբուրգի հայտնի թանգարանում

Անհայտ անձը արցունքաբեր գազ է տարածել Համբուրգում գտնվող Miniatur Wunderland թանգարանի շենքում, ինչի հետևանքով տուժել է 46 մարդ։ Այս մասին հաղորդում է DPA գործակալությունը՝ հղում կատարելով արտակարգ ծառայությունների ներկայացուցչին։

Լրատվամիջոցի փոխանցմամբ՝ հրշեջները տարհանել են մոտավորապես 1000 այցելու թանգարանի շենքից։ Ընդհանուր հաշվով տուժել է 46 մարդ, որոնցից մեկը տեղափոխվել է հիվանդանոց։ Ավելի վաղ ոստիկանությունը հայտնել էր 42 տուժածի մասին, որոնք ստացել էին թեթև վնասվածքներ և շնչուղիների գրգռում։ Մոտ կես ժամ անց այցելուներին կրկին թույլատրվել է մտնել շենք։

Ինչպես նշում է DPA-ը, դեռևս պարզ չէ, թե ով է տարածել արցունքաբեր գազը։ 

Նշենք, որ «Miniatur Wunderland»-ը համարվում է մոլորակի ամենամեծ երկաթուղային մոդելների ցուցահանդեսը և Համբուրգի ամենասիրված զբոսաշրջային ուղղություններից մեկը։ Թանգարանը տարեկան ընդունում է հարյուր հազարավոր այցելուներ տարբեր երկրներից։