Որ դեպքում ԱՊՊԱ-ները կկարողանան դատի տալ քաղաքապետարանին
Ավտոապահովագրողների բյուրոյի գործադիր տնօրենի կարծիքով՝ եթե ճանապարհի չմաքրված վիճակը հստակորեն ֆիքսվի որպես պատճառ, ապա ապահովագրական ընկերությունը կարող է դատական կարգով քաղաքապետարանից կամ այլ պատկան մարմնից վնասների հատուցում պահանջել։ Այս մասին գրում է Sputnik Արմենիա-ն։
«ԱՊՊԱ համակարգը չի կարող աղետ լինել Երևանի համար, իսկ համակարգի բացակայությունը կարող էր աղետալի վիճակի բերել»,- լրատվամիջոցի հետ զրույցում ասել է Ավտոապահովագրողների բյուրոյի գործադիր տնօրեն Վաղինակ Եղիազարյանը։
Այսօր Երևանի քաղաքապետ Տիգրան Ավինյանը գործակարգավարական խորհրդակցության ժամանակ խոսելով փետրվարի 20-ին տեղացած առատ ձյան պատճառով Երևանում ստեղծված քաոսի մասին ասել էր, թե խնդիրն ԱՊՊԱ համակարգի աշխատանքի տրամաբանությունն է, որ մի թեթև իրար «քսելու» պատճառով վարորդները ժամերով սպասել ու ստեղծել են կիլոմետրանոց հերթեր։
«Ավտոապահովագրողների բյուրոյի գործադիր տնօրենը համաձայն չէ այս կարծիքի հետ։ Շեշտում է՝ ցանկացած դիտարկում անելու համար պետք է բավարար ելակետային տվյալներ և վերլուծություն ունենալ, իսկ ինքը վստահ է՝ որևէ մեկը վերլուծություն չի հասցրել անել։ Ասում է՝ հետևանքների մասին խոսելու փոխարեն ավելի շատ պետք է պատճառների դեմ պայքարել։ Իսկ պատահարների պատճառը ոչ թե ԱՊՊԱ համակարգը կարող է լինել, այլ չմաքրված կամ լավ չմաքրված ճանապարհները կամ ձմեռային անվադողերի բացակայությունը»,- գրում է կայքը։։
