Կենդանիները խաղալիք չեն. Թբիլիսիի կենդանաբանական այգու ահազանգը

Առյուծի ձագին, որը սկանդալից հետո Թբիլիսիի կենդանաբանական այգուն է հանձնել ձյուդոիստ և օլիմպիական կրկնակի չեմպիոն Լաշա Բեկաուրին, ինտենսիվ խնամք և բուժում է անհրաժեշտ:

Վիճակն այժմ կայունացել է: Փոքրիկ առյուծը շուրջօրյա կմնա անասնաբույժների հսկողության տակ, հայտնում են կենդանաբանական այգուց:

Կենդանաբանական այգու մասնագետները փաստում են, որ փոքր առյուծը մկանների ախտահարման և զարգացման հետ կապված խնդիրներ ունի: Ընդունվելուց հետո մի քանի ժամ հետո, կենդանու վիճակը կտրուկ վատացել է: Պահանջվել է վերակենդանացման ինտենսիվ բժշկական միջամտություն։

«Կենդանիները խաղալիք չեն: Այս ամենը մորից վաղաժամ բաժանվելու և արհեստական կերակրման անցնելու արդյունք է»,- ասվում է կենդանաբանական այգու հայտարարության մեջ։

Թե որտեղից է մարզիկը ձեռք բերել առյուծի ձագը, որն առանց հատուկ թույլտվության օրինական ճանապարհով չի կարող ներմուծվել Վրաստան, անհայտ է մնում։

Հիշեցնենք, որ սկանդալը ծագեց այն բանից հետո, երբ 24-ամյա տիտղոսակիր մարզիկը տեսանյութ էր հրապարակել, որտեղ երևում է, թե ինչպես է նա խաղում իր Porsche մեքենայում ուղևորի նստատեղին պառկած առյուծի ձագի հետ: Հրապարակումից հետո սոցցանցերը պայթել էին բացասական մեկնաբանություններից: