Բանկերը զրոյացնելու են խնդրահարույց վարկերի տույժերն ու տուգանքները. մանրամասներ
Կենտրոնական բանկի նախագահ Մարտին Գալստյանը ներկայացրել է ֆինանսաբանկային համակարգի 2024 թվականի արդյունքները և ապագա զարգացման հեռանկարները։
Ֆինանսական համակարգի շահութաբերությունը կապիտալի հաշվարկով տարեկան կազմում է մոտ 18%։ Բանկերն ունեն զգալի կապիտալ՝ նորմատիվային կապիտալը կազմում է մոտ 1.7 տրլն դրամ, իսկ ակտիվները՝ մոտ 10 տրլն դրամ։ Համակարգը ոչ միայն համարժեք է մեր երկրի ՀՆԱ-ին, այլ նաև բարձր իրացվելիությամբ է առանձնանում՝ հնարավորություն տալով անխափան կատարել իր պարտավորությունները։
Կառավարության նախաձեռնությամբ բանկերը զրոյացնելու են խնդրահարույց վարկերի տույժերն ու տուգանքները, կուտակված տարիների ընթացքում։
ԿԲ-ն նախաձեռնել է գնաճի թիրախը իջեցնել մինչև 3%, ինչը կօգնի երկարաժամկետ տնտեսական կայունությանը։ Սա կնպաստի ռիսկի հավելավճարների նվազմանը, տնտեսական աճի խթանմանը և ներդրողների վստահության բարձրացմանը։
ԿԲ-ի կողմից կիրառվող լողացող փոխարժեքի քաղաքականությունը Հայաստանի փոքր ու բաց տնտեսության համար ծառայում է որպես շոկերի կլանիչ։ Փոխարժեքի շուկայում գործընթացները պայմանավորված են բացառապես պահանջարկով և առաջարկով։ ԿԲ-ն միջամտում է միայն շուկայի բնականոն ընթացքի խաթարման դեպքում։
ԿԲ-ի դրամավարկային քաղաքականությունը ապահովել է մեր քաղաքացիների վստահության ամրապնդումը ազգային դրամի նկատմամբ, ինչը տնտեսության համար կարևոր հիմք է։
