Վրաստանի ՆԳՆ–ն ընդդիմության գրասենյակներից առգրավել է պիրոտեխնիկա, մոլոտովի կոկտեյլներ

Վրաստանի ՆԳՆ-ն չորեքշաբթի հայտնել է, որ քրեական հետաքննության շրջանակներում ընդդիմադիր կուսակցությունների և կազմակերպությունների գրասենյակներում խուզարկությունների ժամանակ առգրավվել են պիրոտեխնիկա, մոլոտովի կոկտեյլներ, տարբեր լուծույթներ և սարքավորումներ։ Այս մասին գրում է РИА Новости–ն:

«Արտակարգ դեպքի պատճառով խուզարկություններ են կատարվել 6 անձանց անձնական և բնակելի տներում, դատավորի հանձնարարականով քննչական գործողություններ են իրականացվում նաև «Ջիութի» շարժման, «Դրոա» կուսակցության և «Գիրչի» կուսակցության, ինչպես նաեւ «Միացյալ ազգային շարժում» կուսակցության երիտասարդական գրասենյակում... Գրասենյակների խուզարկության արդյունքում որպես ապացույց առգրավվել են սաղավարտներ, մեծ քանակությամբ պիրոտեխնիկա, էլեկտրատեխնիկա, համակարգչային տեխնիկա, մոլոտովի կոկտեյլներ, ներկեր, տարբեր տեսակի լուծույթներ»,- ասված է ՆԳՆ հաղորդագրության մեջ։

Չորեքշաբթի ավելի վաղ Վրաստանի ՆԳՆ-ն հայտնել էր, որ ընդդիմադիր կուսակցությունների գրասենյակներում խուզարկություններից հետո յոթ մարդ է ձերբակալվել: