Աղազարյանը կպատասխանի Փաշինյանին

Ժամեր անց՝ ավելի ստույգ ժամը 18:00-ին, պատգամավոր Հովիկ Աղազարյանը կպատասխանի վարչապետ Նիկոլ Փաշինյանի՝ մանդատից հրաժարվելու առաջարկին։ Փաշինյանը, իր վերջին հարցազրույցի ընթացքում հայտարարեց, որ խորհրդարանում հայտնի լսումներից և Արգիշտի Քյարամյանի հետ տեղի ունեցած միջադեպից հետո ինքը «խնդրանքով» դիմել է ՔՊ-ական պատգամավորներ Նարեկ Զեյնալյանին ու Հովիկ Աղազարյանին, որ մանդատները վայր դնեն:

Առաջինն արդեն կատարել է խնդրանքը, Աղազարյանը դեռ դիմադրում է․ «Անթույլատրելի է այն, ինչ տեղի ունեցավ խորհրդարանում։ Մեր ինստիտուտների պահպանության առումով ճիշտ չէր լինի այս ամենն անարձագանք թողնել։ Այստեղ խնդիրն անձնավորված չէ, խնդիրը համակարգային է»,- նշել էր Փաշինյանը՝ հույս հայտնելով, որ իր «խնդրանքն» անարձագանք չի մնա և Աղազարյանն էլ վայր կդնի մանդատը։

Այսօր Աղազարյանի հետ հանդիպելու առաջարկ է արել նաև Ազգային ժողովի նախագահ Ալեն Սիմոնյանը, որը վերջին օրերին Հայաստանում չէր և ներկա չի եղել նաև վարչության անցած շաբաթվա նիստին, որի ընթացքում ՔՊ վարչությունը որոշել է, որ պատգամավոր Հովիկ Աղազարյանը պիտի վայր դնի մանդատը։