Ով կդառնա ԱՄՆ-ում ՌԴ նոր դեսպան. աղբյուրներ
ԱՄՆ-ում Ռուսաստանի նոր դեսպան կարող է դառնալ Կանադայում նախկին դեսպան Ալեքսանդր Դարչիևը։ Այս մասին գրում է Kommersant.ru-ն՝ հղում անելով երեք աղբյուրների, որոնք նրան անվանել են «այս պաշտոնի ամենահավանական թեկնածու»:
Օրեր առաջ ՌԴ նախագահի մամուլի քարտուղար Դմիտրի Պեսկովն ասել էր, որ ԱՄՆ-ում դեսպանի թեկնածությունն արդեն որոշված է, ուստի նշանակումը տեղի կունենա «տեսանելի ապագայում»։
«Ведомости»- ն առաջինն է գրել Դարչիևի հնարավոր նշանակման մասին։ Թերթի աղբյուրը պնդել է, որ Կանադայում նախկին դեսպանը կուղարկվի ԱՄՆ, քանի դեռ որոշում չի կայացվել իջեցնել այս երկրում Ռուսաստանի դիվանագիտական ներկայացուցչության մակարդակը։
Միաժամանակ Պեսկովը ТАСС-ին ասել է, որ ԱՄՆ-ի հետ դիվանագիտական հարաբերությունների մակարդակի իջեցման ծրագրեր չկան։
Արտաքին գործերի նախարարությունը հրապարակավ չի մեկնաբանում ԱՄՆ-ում նոր դեսպանի թեկնածությունը՝ իրավական սահմանափակումների պատճառով, փոխանցում է ТАСС-ը։
