Ում կնշանակի Թրամփը ռուս-ուկրաինական հակամարտության գծով հատուկ բանագնաց

ԱՄՆ նորընտիր նախագահ Դոնալդ Թրամփը դիտարկում է ռուս-ուկրաինական պատերազմի հարցերով հատուկ բանագնացի պաշտոն ստեղծելու հնարավորությունը և ցանկանում է այդ պաշտոնում նշանակել Գերմանիայում ԱՄՆ նախկին դեսպան Ռիչարդ Գրենելին: Այս մասին գրում Է Reuters-ը՝ հղում անելով չորս աղբյուրների: Տեղեկատվությունը փոխանցում է Meduza-ն:

«Այժմ վարչակազմում նման պաշտոն չկա, սակայն Թրամփը լրջորեն դիտարկում է դրա ստեղծման հնարավորությունը»,-ասում են աղբյուրները և հավելում, որ այնուամենայնիվ, երաշխիք չկա, որ Գրենելը կհամաձայնի:

Գրենելը Թրամփի առաջին պաշտոնավարման ընթացքում՝ 2018-2020 թվականներին, եղել է Գերմանիայում ԱՄՆ դեսպանը, իսկ 2020 թվականի փետրվարից մինչև մայիս եղել է Ազգային հետախուզության տնօրենի պաշտոնակատար: