«Օրենքով գող» «Պզոն» արդարացվել է․ Դատախազության արձագանքը
«Օրենքով գողի» կարգավիճակ ունեցող «Պզո» մականունով Արմեն Ղազարյանի արդարացման վճիռը դատախազությունը բողոքարկելու է։ Այս մասին NEWS.am-ին հայտնել են Դատախազությունից։
Նշենք, որ ավելի վաղ Արմեն Ղազարյանի փաստաբանը հայտնել էր, որ իր պաշտպանյալի նկատմամբ դատարանն արդարացման վճիռ է կայացրել։
Հիշեցնենք, որ 2022 թվականի մարտի 21-ին դատախազը հանրային քրեական հետապնդում էր հարուցել Արմեն Ղազարյանի նկատմամբ այն բանի համար, որ նա, ունենալով քրեական աստիճանակարգության բարձրագույն կարգավիճակ, պահպանել է այն (քրեական օրենսգրքի 322-րդ հոդվածի 1-ին մաս): Ըստ դատախազության՝ 2022 թվականի նոյեմբերի 2-ին նախաձեռնված քրեական վարույթով պարզվել էր, որ 1991 թվականին Արմեն Ղազարյանը Ռուսաստանի Դաշնության Դոնի Ռոստով քաղաքում, քրեական աստիճանակարգության բարձրագույն կարգավիճակ ունեցող անձանց ներկայությամբ «թագադրվելով»՝ ստացել է «օրենքով գողի»՝ քրեական աստիճանակարգության բարձրագույն կարգավիճակ և 2022 թվականի նոյեմբերի 1-ի դրությամբ շարունակել է պահպանել օրենքով չթույլատրվող այդ կարգավիճակը։ Ղազարյանի նկատմամբ որպես խափանման միջոց էր կիրառվել համակցված խափանման միջոցներ՝ բացակայելու արգելքը և 20 մլն դրամի չափով գրավը։ Քրեական գործը 2024թ մարտ ամսից ուղարկվել էր դատարան։
