Լոնդոնը չի մեկնաբանում ՌԴ տարածքում Storm Shadow հրթիռների կիրառման մասին տեղեկությունը
Մեծ Բրիտանիայի պաշտպանության նախարար Ջոն Հիլին ասել է, որ չի մեկնաբանի մամուլի հրապարակումները ՌԴ տարածքում «Storm Shadow» հեռահար հրթիռների կիրառման ենթադրյալ թույլտվության մասին։ Այս մասին գրում է ТАСС–ը:
«Ես չեմ վտանգի օպերացիոն անվտանգությունը՝ այսօր հեռահար համակարգերի վերաբերյալ մեկնաբանություն տալով», - ասել է Հիլին՝ պատասխանելով բրիտանական խորհրդարանի Համայնքների պալատի անդամների հարցերին: Նա նաև կարծիք է հայտնել, որ Լոնդոնը պետք է մեծացնի իր օգնությունը Կիևին։ Նախարարը հավելել է, որ Մեծ Բրիտանիան իր աջակցությունը կհամակարգի ԱՄՆ-ի և եվրոպական դաշնակիցների հետ։
ՌԴ նախագահի մամուլի քարտուղար Դմիտրի Պեսկովն ավելի վաղ հիշեցրել է, որ Մոսկվայի դիրքորոշումը ռուսական տարածքի խորքում ամերիկյան հրթիռային հարվածների վերաբերյալ հստակ և միանշանակ ձևակերպվել է Ռուսաստանի նախագահ Վլադիմիր Պուտինի կողմից սեպտեմբերին։ Նրա խոսքով, այս որոշումը նշանակում է լարվածության «որակապես նոր փուլ»։
