Թուրքիայի նախագահ Ռեջեփ Թայիփ Էրդողանը հայտարարել է, որ Մերձավոր Արևելքում խաղաղություն հնարավոր չէ, քանի դեռ Իսրայելը շարունակում է ցեղասպանությունը Գազայի հատվածում: Ստամբուլում Գերմանիայի կանցլեր Օլաֆ Շոլցի հետ բանակցություններից հետո կայացած մամուլի ասուլիսում նա կողմ է արտահայտվել Իսրայելի վրա ճնշման ուժեղացմանը՝ հակամարտության շուտափույթ կարգավորման համար:

«Գազայում և պաղեստինյան տարածքներում Իսրայելի կողմից իրագործված ցեղասպանությունը, Լիբանանում տեղի ունեցած ահաբեկչությունները մեր քննարկման կարևոր թեմա էին։ Մարդկային ողբերգությունը տարածաշրջանում շարունակվում է։ Մենք պետք է ամեն ինչ անենք, որպեսզի ապահովենք մշտական հրադադար և անհրաժեշտ ճնշում գործադրենք Իսրայելի վրա։ Խաղաղություն հնարավոր չէ, քանի դեռ շարունակվում են զանգվածային սպանությունները», - ասել Է Էրդողանը։

«Ավելի քան 50 հազար մարդ է սպանվել կոտորածի ընթացքում, ավելի քան 100 հազար մարդ վիրավորվել է»,-նշել է Թուրքիայի նախագահը՝ հավելելով, որ Իսրայելը հարձակումների համար օգտագործում է F-35 կործանիչներ:

Նա նաև հայտարարել է, որ Իսրայելը հակամարտության տարածման ծրագրեր է մշակում։

«Ակնհայտ է, որ Իսրայելի վարչապետ Բենյամին Նեթանյահուի գլխում պատերազմի տարածման մասին մտքեր կան», - ասել Է Էրդողանը: