Պեկինը չպետք է թույլ տա իր ռազմական արտադրանքն արտահանել Ռուսաստան. Մեծ Բրիտանիայի պահանջը

Մեծ Բրիտանիայի արտաքին գործերի նախարար Դեյվիդ Լամմին իր չինացի գործընկեր Վան Յիին ասել է, որ Պեկինը չպետք է թույլ տա իր ռազմական արտադրանքն արտահանել Ռուսաստան։ Այս մասին ասվում է Պեկինում նախարարների հանդիպման արդյունքներով ԱԳՆ տարածած հայտարարության մեջ։

«Միացյալ Թագավորությունը և Չինաստանը ընդհանուր շահ ունեն խաղաղության և պատերազմի դադարեցման հարցում: Չինաստանի կողմից ռուսական ռազմարդյունաբերական համալիրին սարքավորումներ մատակարարելը կարող է հանգեցնել նրան, որ  Չինաստանի հարաբերությունները Եվրոպայի հետ գնալով կվատանան», - ասվում է փաստաթղթում: Մեծ Բրիտանիայի արտգործնախարարը նաև կոչ է արել Վան Յիին «ձեռնարկել բոլոր միջոցները մատակարարումների հետ կապված իրավիճակը կարգավորելու համար»:

Չինաստան կատարած այցի ընթացքում բրիտանացի նախարարը հայտարարել է նաև Լոնդոնի և Պեկինի միջև երկկողմ շփումների ակտիվացման անհրաժեշտության մասին։

Նախկինում Չինաստանի ԱԳՆ-ն բազմիցս հայտարարել էր, որ ԱՄՆ-ը և արևմտյան այլ երկրներ ապատեղեկատվություն են տարածում այն ​​մասին, թե իբր Չինաստանը ռազմական աջակցություն է ցուցաբերում Ռուսաստանին։ Պեկինը նաև նշել է, որ ՉԺՀ-ի և Ռուսաստանի Դաշնության միջև տնտեսական և առևտրային համագործակցությունն ուղղված չէ որևէ երրորդ կողմի դեմ։