Հայտնի է, թե ինչ «անակնկալ» է պատրաստում Օրբանն Ուկրաինայի համար․ ԶԼՄ

Հունգարիայի վարչապետ Վիկտոր Օրբանը Հանրապետական կուսակցությունից ԱՄՆ նախագահի թեկնածու Դոնալդ Թրամփի համար ծրագիր է մշակել, թե ինչպես հրաժարվել Ուկրաինային օգնությունից։ Այս մասին գրում է Politico-ն:

«Օրբանը մի միջոց է մտածել, որպեսզի, Սպիտակ տանը նոյեմբերին հաջողությամբ ընտրվելու դեպքում, Թրամփին թույլ տա դուրս գալ 50 միլիարդ դոլարի վարկից, որն ԱՄՆ-ը, Եվրամիությունը և G7-ի առաջնորդներն առաջարկել են Ուկրաինային»,- ասվում է հրապարակման մեջ։

Հոդվածում նշվում է, որ դա թույլ կտա ամերիկացի քաղաքական գործչին Հանրապետական ընտրողներին ասել, որ ընտրվելու դեպքում Կիևին այլևս ոչ մի ցենտ չի տա:

Պարբերականը գրում է, որ եթե Բրյուսելն ու Վաշինգտոնը համատեղ վարկ հատկացնեն, Թրամփը ստիպված կլինի երկար տարիներ սպասարկել այն: Բայց եթե դա հաստատեն առանց ԱՄՆ-ի մասնակցության, Թրամփը նման պարտավորություններ չի ունենա։

G7-ի համաձայնագրով՝ 50 միլիարդ դոլարի ամբողջ գումարը պետք է մարել սառեցված ռուսական ակտիվներից ստացված շահույթի հաշվին, որոնց մեծ մասը պահվում է ԵՄ-ում:

Սպիտակ տունն ի սկզբանե իր մասնակցությունը նախագծին կախվածության մեջ է դրել ԵՄ պատժամիջոցների ռեժիմի փոփոխություններից՝ պահանջելով, որ Եվրոպայում ռուսական ակտիվները սառեցված մնան առնվազն երեք տարի: Ավելի ուշ Հունգարիան վետո դրեց այդ ծրագրի վրա և պնդեց, որ պատժամիջոցները երկարաձգվեն յուրաքանչյուր վեց ամիսը մեկ: Դա ստիպեց Եվրահանձնաժողովին առաջարկել այլընտրանքային ծրագիր՝ դաշինքի ընդհանուր բյուջեից մինչև 35 միլիարդ եվրո ներգրավելու համար, լուծում, որը պահանջում է ԵՄ անդամ երկրների մեծամասնության աջակցությունը: Եթե ԱՄՆ-ն միանա ծրագրին, ապա ԵՄ-ի վճարած գումարը կարող է նվազել։ Արևմտյան պաշտոնյաների խոսքով՝ ամերիկյան կառավարությունը քննարկում է տարբեր չափերի գումարներ, այդ թվում՝ հինգ միլիարդ դոլարի ներդրման հնարավորությունը, որը համարժեք է ԱՄՆ -ում սառեցված ռուսական ակտիվներին: