ՆԱՏՕ-ի որ սխալն է հանգեցրել Ուկրաինայում հակամարտության
Ներկայիս իրավիճակը կարող էր չլինել, եթե ՆԱՏՕ-ն Ռուսաստանի հետ քննարկեր 2021 թվականին անվտանգության երաշխիքների մասին պայմանագրի նախագիծը։ Այս մասին ՌԻԱ Նովոստիին տված հարցազրույցում հայտարարել է Հունգարիայի ԱԳ նախարար Պետեր Սիյարտոն։
«Ես հիշում եմ այդ օրերը։ Կարծում եմ, այն, ինչ այն ժամանակ պակասում էր, լուրջ քննարկումն էր», – ասել է Սիյարտոն։
Նա նշել է, որ միշտ հավատում է բանավեճին և երկխոսությանը։
«Ցավոք, այդ քննարկումը տեղի չունեցավ։ Դրանից անցել է գրեթե երեք տարի: Եվ միգուցե այն, ինչ ես հիմա ասում եմ, իմաստ չունի, բայց ես կցանկանայի, որ այդ երկխոսությունները կայանային: Քանի որ, եթե դրանք կայանային, մենք, հնարավոր է, չհայտնվեինք ներկա իրավիճակում», - ընդգծել է նա։
2021 թվականի վերջին Ռուսաստանը հրապարակեց ԱՄՆ-ի հետ պայմանագրի և ՆԱՏՕ-ի հետ անվտանգության երաշխիքների մասին համաձայնագրի նախագծերը, իսկ հունվարի 26-ին ԱՄՆ-ն և ՆԱՏՕ-ն այդ առաջարկների գրավոր պատասխանները փոխանցեցին Մոսկվային։ ՆԱՏՕ-ի հետ անվտանգության երաշխիքների մասին համաձայնագրի նախագծում Ռուսաստանն առաջարկել է բացառել դաշինքի հետագա ընդլայնումը եւ դրան Ուկրաինայի միացումը, հրաժարվել ռազմական գործունեությունից Ուկրաինայի եւ Արեւելյան Եվրոպայի, Անդրկովկասի եւ Կենտրոնական Ասիայի այլ երկրներում:
