ԱՄՆ-ից հերքում են պաշտոնական Բաքվի պնդումները

ԱՄՆ նախագահի կլիմայական քաղաքականության հարցերով ավագ խորհրդական Ջոն Պոդեստան հերքել է պաշտոնական Բաքվի պնդումները, թե մի խումբ կոնգրեսականների նամակը, որով կոչ է արվում պատժամիջոցներ կիրառել Ադրբեջանի իշխանությունների դեմ, գրված է Պետդեպարտամենտում:

Երեկ Բաքվում, լրագրողների հետ զրույցում, ամերիկացի պաշտոնյան նշել է՝ պնդումները, թե ԱՄՆ գործադիր իշխանությունը վերահսկում է Կապիտոլիումի գործողություններն, իրականությանը չեն համապատասխանում։

Պոդեստան, սակայն, չի հստակեցրել՝ որն է պաշտոնական Բաքվի դեմ պատժամիջոցներ սահմանելու պահանջի հարցում Վաշինգտոնի դիրքորոշումը։

«Նամակն արտացոլում է նրանց (կոնգրեսականների) մտահոգությունը Ադրբեջանում մարդու իրավունքների վերաբերյալ։ Այդ ամենն իրենց անձնական, անկախ հայացքներն են։ Նրանք ենթակա չեն պետքարտուղարի կամ գործադիր իշխանության որևէ այլ ազդեցության», - ադրբեջանական լրատվամիջոցի փոխանցմամբ, ասել է Ջոն Պոդեստան։

Սպիտակ տան ներկայացուցչի խոսքով՝ Ադրբեջանում մարդու իրավունքների թեման «պարբերաբար քննարկվում է Վաշինգտոնի և Բաքվի միջև», այդ թվում՝ երկու երկրների դիվանագիտական գերատեսչությունների ղեկավարների մակարդակով։

Ըստ նրա՝ Ալիևի վարչակազմը Վաշինգտոնին խոստացել է կատարել «մարդու իրավունքների և մամուլի ազատության վերաբերյալ ստանձնած պարտավորությունները»։

«Մենք ակնկալում ենք, որ իշխանությունները կկատարեն այդ խոստումները», - հայտարարել են ամերիկյան կողմից։

Ավելի վաղ Ադրբեջանի նախագահ Իլհամ Ալիևը քննադատել էր Միացյալ Նահանգներին, մասնավորապես, պետքարտուղար Էնթոնի Բլինքենին՝ հայտարարելով, թե իրեն տեղեկացրել են, որ 60 հայամետ կոնգրեսականներ դիմել են Ամերիկյան կառավարությանն՝ Ադրբեջանի նկատմամբ հավելյալ պատժամիջոցներ սահմանելու խնդրանքով։ «Երբ նայեցի այդ փաստաթղթին, կռահեցի, որ դրա հեղինակն ու հասցեատերը միևնույն մարդն է՝ Միացյալ Նահանգների պետքարտուղարը», - ասել էր Ալիևը։

Ալիևի հայտարարությունից օրեր անց հաղորդվեց, որ Ադրբեջանի Միլի մեջլիսի 43 պատգամավորները նամակ են հղել Բայրամովին՝ կոչ անելով խզել ԱՄՆ-ի հետ համաձայնագրերը և դադարեցնել ԱՄՆ ՄԶԳ-ի հետ ծրագրերը: