Փակ նիստ` Թուրքիայի խորհրդարանում

Թուրք խորհրդարանականները երեքշաբթի փակ նիստ են անցկացրել՝ քննարկելու համար Մերձավոր Արևելքում պատերազմի տարածման հարցը՝ երկրի նախագահ Ռեջեփ Թայիփ Էրդողանի չհիմնավորված պնդումից մեկ շաբաթ անց, որ Իսրայելը, ի վերջո, մտադիր է ներխուժել թուրքական տարածք, հայտնում է Reuters գործակալությունը։

Իսրայելը հրապարակավ չի արձագանքել Էրդողանի հայտարարությանը, որը վերլուծաբաններն ու ընդդիմադիր օրենսդիրները համարում են չկշռադատված և առաջին հերթին Թուրքիայի տնտեսական խնդիրներից հասարակության ուշադրությունը շեղելուն ուղղված հայտարարություն:

Իսրայելը նաև չի մեկնաբանել երեքշաբթի Անկարայում անցկացված «Իսրայելական օկուպացիան Լիբանանը և իրադարձությունները տարածաշրջանում» խորագրով խորհրդարանական փակ նիստը, գրում է գործակալությունը։

Խորհրդարանի խոսնակ Նուման Քուրթուլմուշը հայտարարել է, որ արտաքին գործերի եւ պաշտպանության նախարարները զեկույցներով հանդես կգան փակ նիստում, Գազայի եւ Լիբանանի հակամարտությունների հետագա ընդլայնման վտանգի մասին, որի մասին խնդրել է ընդդիմությունը: