Իսրայելական բանակը ռազմական ռեյդ  է իրականացնում Հորդանանի արևմտյան ափի մի քանի վայրերում։ Այս մասին հայտնում է քաթարյան Al Jazeera հեռուստաալիքը։

Նրա խոսքով՝ իսրայելական ռազմական տեխնիկայի շարասյունը ներխուժել է գրավյալ Արևմտյան ափի Թուլկարմ քաղաք՝ պաշարելով կառավարական հիվանդանոցը։ Երկու բանակային բուլդոզերներ սկսել են ոչնչացնել տրանսպորտային ենթակառուցվածքը Թուլկարմում՝ քաղաքի արևմուտքում, հյուսիսում և արևելքում գտնվող շրջանաձև երթևեկության շուրջ, նշում է հեռուստաալիքը։

Հորդանան գետի արևմտյան ափի այլ շրջաններից նույնպես տեղեկություններ են ստացվել իսրայելական բանակի և տեղի բնակիչների միջև հարձակումների և բախումների մասին: Հաղորդվում է, որ զորքերը գրոհել են Ջենին քաղաքը, Բեթղեհեմում գտնվող Դեհեյշե փախստականների ճամբարը և Բեթղեհեմից արևմուտք գտնվող Հուսան գյուղը։ Պաղեստինյան դիմադրության խմբերի և իսրայելցի զինվորականների միջև բախումներ են գրանցվել Ալ-Բիրա քաղաքի հյուսիսում՝ Ջալազոն ճամբարի մոտ։ Նաբլուսից հարավ գտնվող Մադամա գյուղում մի խումբ պաղեստինցիներ են ձերբակալվել, ևս մեկ տղամարդ ձերբակալվել է Քալքիլիա քաղաքում, հայտնում է Al Jazeera-ն։