Ադրբեջանը տուժել է այս աղետից և կցանկանար կանխել սցենարի կրկնությունը. Ամիրբեկով

Հայաստանը «պետք է» շտապ լուծի իր գործող Սահմանադրությամբ ամրագրված ակնհայտ տարածքային պահանջի հարցը՝ կապված «Ադրբեջանի ինքնիշխան տարածքի մի մասի» հետ։ Այս մասին հայտարարել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը Faro di Roma-ին և Eurasiaticanews-ին տված հարցազրույցում:

Նրա խոսքով՝ Հայաստանը, ժխտելով խաղաղության համար այս կարևոր խոչընդոտի արդիականությունը և ամեն գնով կիսատ-պռատ տեքստի ստորագրման պարզունակ, անիրատեսական ուղիներ ընտրելով, անտեսում է երկու երկրների միջև տասնամյակների առճակատման հիմնարար պատճառը։

«Երկու երկրների միջև ուղիղ երկկողմ բանակցությունները՝ խաղաղության պայմանագրի վերաբերյալ, մտել են վճռական վերջնական փուլ, և ես այստեղ եմ վերահաստատելու Ադրբեջանի ամուր հանձնառությունը Հայաստանի հետ կայուն, անվտանգ և անշրջելի խաղաղության հասնելու համար: Այս նպատակին հասնելու համար մեր սուրբ պարտքն է ապահովել, որ ապագա խաղաղության համաձայնագիրը բացարձակապես, նույնիսկ տեսականորեն, անհնարին դարձնի ցանկացած վերադարձ տարածքային պահանջներին, ագրեսիային կամ ռազմական հակամարտություններին: Ադրբեջանը բավականաչափ տուժել է այս աղետից և կցանկանար կանխել այս սցենարի կրկնությունը ապագայում: Դրա համար Հայաստանը պետք է շտապ լուծի Ադրբեջանի ինքնիշխան տարածքի մի մասի նկատմամբ իր ներկայիս Սահմանադրությամբ ամրագրված ակնհայտ տարածքային պահանջներով հարցը։ Ժխտելով խաղաղության ճանապարհին այս գլխավոր խոչընդոտի արդիականությունը և ամեն գնով կիսատ տեքստ ստորագրելու համար ընտրելով պարզեցված և ոչ կենսունակ ուղիներ՝ Հայաստանը փորձում է անտեսել մեր երկրների միջև դիմակայության հիմքում ընկած պատճառը: Այնպես որ, այսօր գնդակը հայկական կողմում է, և մենք հույս ունենք, որ մեր հարաբերություններում ողբերգական էջը շրջելու պատմական հնարավորությունը բաց չի թողնվի»,- ասել է նա։