Իսրայելը դեռ «անակնկալներ» ունի․ Գալանտ

Շիական «Հեզբոլլահ» շարժումը մեկը մյուսի հետևից լուրջ հարվածներ է ստանում, Իսրայելը դեռ «անակնկալներ» ունի։ Այս մասին հայտարարել է Իսրայելի պաշտպանության նախարար Յոավ Գալանտը, հաղորդում է Ynet-ը։

«Մեկը մյուսի հետևից հզոր հարվածներ ենք հասցնում «Հեզբոլլահին»։ Ոչնչացվել է շիա զինյալների հրթիռային պաշարների մեծ մասը։ Ոչնչացվել են կապի համակարգերը, շտաբներն ու բունկերները։

Բացի այդ, վերացվել են «Հեզբոլլահի» ողջ վերնախավը, պարագլուխները, ահաբեկչության կազմակերպիչներն ու կազմակերպության դաշտային հրամանատարները։ Դա հսկայական տարբերություն է ստեղծում: Ռազմական հետախուզությունը ստուգված տեղեկատվություն է տրամադրում ճշգրիտ արդյունավետ հարվածներ հասցնելու համար»,- ասել է Յոավ Գալանտը։

Նշվում է, որ այսօր Իսրայելի ռազմաօդային ուժերի հարձակման հետևանքով սպանվել է «Հեզբոլլահի» կապի դեպարտամենտի ղեկավար Մուհամադ Ռաշիդ Սահաֆին: