Ալիևը մեղադրում է Հայաստանին

Ֆրանսիան և նրա նման արևմտյան պետություններն ամեն ինչ անում էին, որպեսզի օկուպացիան հավերժ լինի: Այս մասին հայտարարել է Ադրբեջանի նախագահ Իլհամ Ալիևը:

«Հայաստանը խախտել է միջազգային իրավունքի բոլոր նորմերն ու սկզբունքները, օկուպացրել է մեր հողերի մոտ 20 տոկոսը, իրականացրել է էթնիկ զտման քաղաքականություն, իրականացրել է Խոջալուի ցեղասպանություն, ավերել է մեր բոլոր քաղաքներն ու գյուղերը: Արևմտյան որևէ պետության պաշտոնական ներկայացուցիչ գոնե մեկ անգամ նկատողություն է արե՞լ նրանց։ Ոչ»,- ասել է Ալիևը:

Ալիևի խոսքով` Մինսկի խումբը զբաղվել է այդ գործերը կոծկելով, հայկական օկուպացիան որոշ չափով արդարացնելով և Ադրբեջանին նվաստացուցիչ խաղաղության մղելով:

«Երբ մենք բարձրացնում էինք մեր արդար ձայնը բոլոր միջազգային հարթակներում, մեզ ասում էին, որ ձեր խոսքերը չափազանց սուր է: Մենք պետք է մեր ձայնը բարձրացնենք միջազգային հարթակներում: Այս կտրուկ հռետորաբանությունը ոչ թե մոտեցնում է աշխարհը, այլ հեռացնում այն:

Այս հակամարտության ռազմական լուծում չկա։ Այսինքն ՝ Ֆրանսիան և նրա նման արևմտյան պետություններն ամեն ինչ անում էին այդ օկուպացիան հավերժացնելու համար»,-նշում է Ալիևը: