Կիրակին մոտ է, կիրակին կգա, կտեսնենք․ Քոչարյան
Ընդդիմությունն իր խոսքը հանրությանը հասցնելու հետ կապված պրոբլեմ չի ունեցել. հսկայական լրատվամիջոցներ, հեռուստաընկերություններ առավոտից երեկո լուսաբանել են Գալստանյանին՝ առավոտվա արթնանալուց մինչեւ քնելը: Այս մասին NEWS.am-ի հետ զրույցում նշեց ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը՝ անդրադառնալով ընդդիմության պնդմանը, որ երեկ Հանրայինի եթերում Բագրատ ՍՐբազանի հանդես գալը իրենց առաջին հաղթանակն է:
«Պետրոս Ղազարյանը երեկ էլ շեշտեց, որ երբեւէ խնդիր չի եղել, միշտ առաջարկ եղել է՝ եկեք զրույցի, եւ իրենք միշտ խուսափել են: Երեկ էլ պայման դրվեց, որ ուղերձով հանդես գա, ուղերձից հետո էլի խուսափում էր պատասխանել հարցերին: Այն աստիճանի էր խուսափում, որ մի նոթատետր ունի, ինչ-որ մտքեր է հավաքագրել, չկարողացավ այդ մտքերն առանց նոթատետրի արձանագրի՝ 9-րդ կետի վերաբերյալ: Չկար պատկերացում, թե քաղաքական օրակարգի մեջ իր ներկայությունն ինչի հետ է կապված, որտեղից հայտնվեց: Ինչու հայտնվեց Տավուշում եւ ինչու անհետացավ: Եկան էստեղ իշխանության հետեւից եւ իրենց իշխանության մղողները մնացին ստվերում, իրենք մնացին մենակ: Հասարակությունը դա գիտակցելով՝ իրենց էլի թողեց մենակ»,-ասաց նա:
Քոչարյանը վստահեցրեց, որ իշխանության մեջ որեւէ անհանգստություն չկա Բագրատ Սրբազանի ակտիվացումից. «Անհանգստություններ ստեղծողն էլ, կառավարողն էլ իրենք են, բայց արդեն այդ անհանգստություններից գնացող անձնակազմը չկա: Տեսեք նա ոնց իրեն պահեց ոստիկանական ուժերի եւ ղեկավար կազմի հետ շփումներում՝ ասելով կտրորեմ»:
Դիտարկմանը, որ ոստիկանապետն էլ իրեն անվանեց «համբալ», ՔՊ-ական պատգամավորն ասաց. «Ոստիկանապետը որեւէ արձագանք չի արել իրեն, դա արձանագրված է: Ոստիկանությունը ուժային է, կարող է մի բան էլ ավել ասի, բայց հոգեւորականի խնդիրը տրորելը չի, հոգեւոր խոսք ասելն է, որով նա պետք է մեզ չտա հնարավորություն, որ մեզ մոտ ուժային ցանկությունները բոցկլտան: Ինքը հիմա փորձում է բոլորին պիտակավորել, վարկաբեկել, վիրավորել, բայց շատ սրտնեղում է, որ իրական միջավայրում իր մասին կարծիքներ են հնչում, որի հետ ինքն ու իր մերձակա շրջապատը համաձայն չեն»:
Նա համոզմունք հայտնեց, որ Բագրատ Սրբազանի առաջնորդած շարժումը չի հաջողելու. «Շատ բարձր տոկոսային հավանականությամբ տեսնում եմ, որ եթե Գալստանյանի շարժումը հաջողված պետք է լիներ, պետք է լիներ մայիսին: Եթե այն ժամանակ չեն հաջողել, որովհետեւ գերներդրումային փաթեթ են դրել տվյալ անձնավորության քաղաքական հեռանկարը կերտելու համար, հիմա որեւէ հաջողություն ակնկալել հնարավոր չէ: Տեսե՞լ եք՝ քանի անգամ է օրական «նեռ» բառն օգտագործում: Դրանից բան չի փոխվում: Երբ նույն հաղորդման ժամանակ հաղորդավարն ասում է՝ այսինչ բանը այդպես չի ասվել, ինչո՞ւ ես ստում, ինքը փորձում է ստելով արձագանքել հաղորդավարի հնչեցրած տեսակետին: Կիրակին մոտ է, կիրակին կգա, կտեսնենք»:
