Իսրայելը շարունակում է քննարկել անցյալ գիշեր Իրանի հրթիռային հարձակմանն իր պատասխանի հնարավոր տարբերակները: Իսրայելի վարչապետ Բենիամին Նեթանյահուն խորհրդակցություն է անցկացրել Թել Ավիվում անվտանգության ուժերի ղեկավարների հետ։ Այս մասին հայտնել է Իսրայելի վարչապետի գրասենյակը։

Հաղորդվում է, որ հանդիպմանը ներկա էին Իսրայելի ներքին անվտանգության ծառայության՝ Շին Բեթի ղեկավար Ռոնեն Բարը, արտաքին հետախուզության՝ Մոսադի տնօրեն Դեյվիդ Բարնեան, Իսրայելի պաշտպանության բանակի շտաբի պետ Հերցի Հալևին և պաշտպանության նախարար Յոավ Գալանտը:

Խորհրդակցությունը տեղի է ունենում Իսրայելի դեմ լայնածավալ հրթիռային հարձակման հաջորդ օրը։ Հիշեցնենք՝ Իրանը հոկտեմբերի 1-ի երեկոյան հրթիռակոծել է Իսրայելը: Ընդհանուր առմամբ, 100-ից ավելի հրթիռ է արձակվել Իսրայելի տարածք։