Միրզոյանը՝ ՀԱՊԿ-ից դուրս գալու հնարավորության մասին

Անհրաժեշտ է մանրակրկիտ գնահատել ՀԱՊԿ-ից Հայաստանի հնարավոր դուրս գալու հետ կապված բոլոր ռիսկերը։ Այսօր Վարշավայում անվտանգության ֆորումի շրջանակում կազմակերպված հանդիպման ժամանակ հայտարարել է ՀՀ ԱԳ նախարար Արարատ Միրզոյանը՝ պատասխանելով կազմակերպությունից երկրի դուրս գալու հեռանկարների մասին հարցին։ Նա ընդգծել է, որ այս հարցում պետք է հատուկ զգուշություն ցուցաբերել։

«Գերակայությունը կայունությունն է, և ցանկացած գործընթաց, որը կարող է տեղի ունենալ, պետք է մանրակրկիտ հաշվարկվի և կառավարվի, հատկապես ռիսկերի տեսանկյունից: Դա հեշտ հարց չէ»,-նշել է Միրզոյանը։

Ավելի վաղ ՀՀ վարչապետ Նիկոլ Փաշինյանը, ելույթ ունենալով Համաշխարհային հայկական գագաթնաժողովում, հայտարարել էր, որ ՀԱՊԿ-ի հետ հարաբերություններում երկիրը մոտենում է «անդառնալիության կետին», նա կազմակերպությանը մեղադրել էր «Հայաստանի ինքնիշխանությանը սպառնալիքներ» ստեղծելու համար:

Փաշինյանի հայտարարությանը արձագանքել են Կրեմլից։ ՌԴ նախագահի մամուլի քարտուղար Դմիտրի Պեսկովը անհամաձայնություն է հայտնել Հայաստանի վարչապետի գնահատականների հետ՝ ընդգծելով, որ ՀԱՊԿ-ից ոչ մի սպառնալիք չի բխում. ընդհակառակը, կազմակերպության կոչումը իր անդամ երկրների ինքնիշխանությունը պաշտպանելն է: