Դրանք ընդամենն իրականության խեղաթյուրումներ են․ Նիկոլ Փաշինյան

ՀՀ իշխանությունները լիովին երաշխավորում են իր տարածքով մարդկանց, տրանսպորտային միջոցների ու ապրանքների ազատ և անվտանգ տեղաշարժը։ Այս մասին Եվրասիական միջկառավարական խորհրդի ընդլայնված կազմով նիստի ժամանակ հայտարարել է ՀՀ վարչապետ Նիկոլ Փաշինյանը։

Տրանսպորտային ենթակառուցվածքների զարգացման ենթատեքստում Փաշինյանը ևս մեկ անգամ հիշեցրեց ՀՀ կառավարության նախաձեռնած «Խաղաղության խաչմերուկ» ծրագիրը։

«Այն բոլոր պնդումները, թե ՀՀ–ն ինչ–որ մի տեղ, ինչ–որ մի փաստաթղթում իբր թե համաձայնել է, որ 3–րդ երկրները պետք է ապահովեն իր տարածքի ենթակառուցվածքների անվտանգությունը, դրանք ընդամենն իրականության խեղաթյուրումներ են։ Նաև ուզում եմ ավելացնել, որ նույնպիսի խեղաթյուրումներ են այն պնդումները, թե իբր ՀՀ–ն համաձայնել է ենթակառուցվածքների համար իր ինքնիշխանության որոշ սահմանափակումների»,– նշել է նա։

Փաշինայնը նիստի ժամանակ անդրադարձել է նաև էներգակիրների մեկ միասնական համակարգի ստեղծմանը` նշելով, որ դրա ձգձումը զգալիորեն դանդաղեցնում է միության անդամ երկրների տնտեսությունների զարգացումը, որի տեմպերը կարող էին լինել շատ ավելի բարձր, քան հիմա են։

Նա նաև նշել է՝ հայկական կողմը առաջնահերթ նշանակություն է տալիս 3–րդ երկրների հետ ազատ առևտրի համաձայնագրերի կնքման բանակցություններին, որոնք տրամադրված են փոխշահավետ համագործակցության։

Այդ համատեքստում նա ասել է, որ այս նիստի շրջանակում նախատեսվում է համատեղ միջացառումների` 2024–26 թթ. ծրագիրը ստորագրել ԵԱՏՄ և Ուզբեկստանի միջև, որը կնպաստի առևտրաշրջանառությանն ու տնտեսական համագործակցության զարգացմանը։