Թուրքիան շարունակում է ջանքեր գործադրել այդ նպատակին հասնելու համար

Թուրքիայի նախագահ Ռեջեփ Թայիփ Էրդողանը Նյու Յորքում Վլադիմիր Զելենսկու հետ բանակցությունների ժամանակ հայտարարել է, որ Անկարան ջանքեր կգործադրի Ուկրաինայում հացահատիկի գործարքի վերականգնման և կրակի դադարեցման համար:

Էրդողանը Զելենսկուն ընդունել է Նյու Յորքի «Թուրքական տանը», որտեղ նա ժամանել է ՄԱԿ-ի Գլխավոր ասամբլեայի 79-րդ նստաշրջանին մասնակցելու համար։ Հանդիպման ընթացքում քննարկվել են Թուրքիայի և Ուկրաինայի միջև երկկողմ հարաբերությունները, պատերազմի ընթացքն ու խաղաղ ջանքերը, տարածաշրջանային և գլոբալ հարցեր։

«Հանդիպման ընթացքում նախագահ Էրդողանը հայտարարել է, որ Թուրքիան միշտ հավատացել է, որ ուկրաինա-ռուսական պատերազմը կարելի է ավարտել երկխոսության միջոցով՝ պաշտպանելով Ուկրաինայի տարածքային ամբողջականությունն ու ինքնիշխանությունը, և որ Թուրքիան շարունակում է ջանքեր գործադրել այդ նպատակին հասնելու համար», - հայտնել է Թուրքիայի ղեկավարի գրասենյակը։

«Նախագահ Էրդողանը հայտարարել է, որ Թուրքիան պատրաստ է ձեռնարկել աջակցության բոլոր հնարավոր քայլերը, ներառյալ միջնորդությունը, արդար և կայուն խաղաղության հասնելու համար, և որ կշարունակվեն ջանքերը Սևծովյան հացահատիկային նախաձեռնությունը վերակենդանացնելու և Ուկրաինայի և Ռուսաստանի միջև հրադադարի հասնելու համար, որը կարող է խաղաղության դուռ բացել», - ասվում է հաղորդագրության մեջ: