Արգելել եմ, որ ՀՀ օգտագործած հագուստ, ավտոներ, կիսամաշ պակռիշկա ուղարկեն․ Փաշինյան
Մենք պետք է դադարենք Հայաստանն ընկալել որպես ֆորպոստ։ Այս մասին Համաշխարհային հայկական գագաթնաժողովի ժամանակ հայտարարեց ՀՀ վարչապետ Նիկոլ Փաշինյանը:
«Հայաստանն ինքնիշխան պետություն է, որի միակ ֆունկցիան պետք է լինի իր քաղաքացիների անվտանգությունն ու բարեկեցությունն ապահովելը։ Բարեկեցության մեջ մտնում են ազատությունը, արդարությունը, ժողովրդավարությունը»,- նշեց Փաշինյանը։
Ըստ նրա՝ քաղաքացիների երջանկությունը ևս պետք է որպես քաղաքական նպատակ ձևակերպվի։
«Բայց ասում են՝ ո՞նց եք երջանկացնելու ընտանիքներին։ Երջանկացնելու մասին չի խոսքը, այլ երջանկությունը հնարավոր դարձնելու, ամեն մեկն ինքը թող որոշի՝ ինչպես է երջանիկ»,- ասաց Փաշինյանը։
Նա նաև օրինակ բերեց՝ արվեստագետը երջանիկ է, երբ ունի լսարան, իսկ Հայաստանում արվեստագետները մեծամասամբ երջանիկ չեն, որովհետև լսարանը շատ սահմանափակ է։
Նրա խոսքով՝ մարդու երջանկության համար էլ կարևոր են խաղաղությունը, բարեկեցությունը, նաև հոգևոր կյանքը, որը, ըստ Նիկոլ Փաշինյանի, մեզ մոտ կրկին սխալ ընկալում ունի՝ միայն կրոնական իմաստով, մինչդեռ մշակութային կյանքն էլ հոգևոր կյանքի անբաժան մասն է։
Փաշինյանի խոսքով՝ մարդը երջանիկ է, երբ կարող է գնալ թատրոն, համերգ, երբ բեմերում տեղի են ունենում իրադարձություններ, որի համար արժե ջանք գործադրել և գումար ծախսել։
«Իսկ ֆորպոստում երջանկությունը նպատակ չէ, մաքառումն է նպատակ։ Ես նաև ուզում եմ, որ Հայաստանը կարեկցանքի օբյեկտ լինելու կարգավիճակից դուրս գա»,-ասաց ՀՀ վարչապետը։
«Ես, օրինակ, արգելել եմ, որ Հայաստան օգտագործված հագուստ, ավտոմեքենա, կիսամաշ պակռիշկա ուղարկվեն։ Հայաստանի կառավարությունն ի վիճակի է իր պատասխանատվության ներքո գտնվող հիմնարկների համար ինչ-որ մինիմում ապահովել: Այսինքն Հայաստան կիսամաշ բաներ ուղարկելու, դրանք ամիսներով լուսաբանելու ընկալումից պետք է դուրս գալ: Ես կոնֆլիկտ ունեմ Հայաստանի այդ ընկալման հետ»,-ասաց ՀՀ վարչապետը:
