ՀՀ ղեկավարության ջանքերն Ադրբեջանին վատ իրավիճակի մեջ են դրել. Աղազարյան

Այն, որ մեր ԱԳՆ-ն ու կառավարությունը ջանքեր են գործադրում Ադրբեջանի հետ խաղաղության պայմանագիր ստորագրելու հարցում՝ Ադրբեջանին դրել է շատ վատ իրավիճակի մեջ։ Փաստորեն, մենք ապացուցեցինք, որ պատրաստ ենք ստորագրել խաղաղության պայմանագրի նման մի փաստաթուղթ՝ այն կետերով, որոնց շուրջ տարաձայնություններ չկան։ Այս իրողության հետ հակադրվելը շատ դժվար է և, հետևաբար, Ադրբեջանի ղեկավարությունը որդեգրեց այս տարբերակը՝ Սահմանադրության հետ կապված ոչ լուրջ փաստարկներ առաջ բերելը։ Այս մասին «Փաստինֆո»-ի հետ զրույցում ասաց «Քաղաքացիական պայմանագիր» խմբակցության պատգամավոր Հովիկ Աղազարյանը։

Հիշեցնենք, որ Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն այսօր հայտարարել է, որ Ադրբեջանն անընդունելի է համարում Հայաստանի հետ խաղաղության պայմանագրի ստորագրումը, քանի դեռ Հայաստանը փոփոխություններ չի կատարել Սահմանադրության մեջ։

«Սա ապացուցում է, որ Ադրբեջանի համար այս պահին անընդունելի է խաղաղության պայմանագրի կնքումը և ամեն կերպ ձգձգում են պայմանագրի կնքումը՝ հույս ունենալով, որ աշխարհաքաղաքական իրողությունները կզարգանան այնպես, որ բարենպաստ պայմաններ կստեղծեն իրենց համար ռազմական գործողություններ սկսելու և ուժային տարբերակով հարցեր լուծելու համար»։

ՀՀ արդարադատության նախարար Գրիգոր Մինասյանը հայտարարել էր, որ սահմանադրական բարեփոխումների հանրաքվեն նախատեսվում է 2027 թվականին։ Հարցին, թե հնարավո՞ր է, որ, այնուամենայնիվ, Հայաստանը զիջի այս հարցում ևս և 2027 թ-ից ավելի շուտ գնա Սահմանադրական փոփոխությունների՝ պայմանագիրն ստորագրելու համար՝ Աղազարյանը պատասխանեց՝ ոչ, որովհետև առջևում դեռ ընտրություններ կան, ու ՀՀ քաղաքական ուժերը պատրաստվելու են ընտրությունների։

Մանրամասները՝ սկզնաղբյուր կայքում։