ԵՄ-ն պատրաստ է հրաժարվել ռուսական գազից․ Քադրի Սիմսոն
Եվրամիության երկրների ներմուծման մեջ ռուսական գազի մասնաբաժինը կտրուկ նվազել է Ուկրաինայի դեմ Ռուսաստանի պատերազմի սկսվելուց հետո։ ԵՄ-ն պատրաստ է ամբողջությամբ հրաժարվել Մոսկվայից մատակարարումներից։ Այս մասին հայտարարել է էներգետիկայի հարցերով եվրահանձնակատար Քադրի Սիմսոնը, հայտնում է РБК-Украина՝ վկայակոչելով Եվրահանձնաժողովի կայքը։
Նրա խոսքով՝ ԵՄ ներմուծման մեջ ռուսական գազի մասնաբաժինը 2021 թվականի 45% -ից մինչև 2024 թվականի հունիս նվազել է մինչև 18%, այն դեպքում, երբ այնպիսի հուսալի գործընկերներից, ինչպիսիք են Նորվեգիան և ԱՄՆ-ը, ներմուծումն աճել է։
«ԵՄ-ն պատրաստ է ապրել առանց ռուսական բնական գազի, որը տարանցվում էր Ուկրաինայի տարածքով»,- ասել է նա։
Նշենք, որ Ռուսաստանի Դաշնությունից Ուկրաինայի տարածքով Եվրոպա գազի տարանցման պայմանագրի ժամկետը լրանում է այս տարվա վերջին։
