ՏԵՍԱՆՅՈՒԹ․ Հնարավոր չէ բոլոր պրոբլեմները լուծել միանգամից․ Նիկոլ Փաշինյանի առաջարկը

ՀՀ վարչապետ Նիկոլ Փաշինյանը, ֆեյսբուքյան էջում հրապարակել է տեսանյութ-ուղերձ՝ դիմելով հայրենակիցներին։ Նա առաջարկել է, որ բնակիչներն իրենց բնակավայրերի խնդիրները հավաքեն, ռեյտինգավորեն, ինչը կնպաստի դրանց արդյունավետ լուծմանը։

Նա, մասնավորապես, նշել է. «Բազմաթիվ բնակավայրերի բազմաթիվ պրոբլեմներ մեզ հաջողվել է լուծել: Տեսնելով, որ պրոբլեմները լուծվում են տարբեր բնակավայրերի մեր սիրելի հայրենակիցները իմ պաշտոնական կամ ոչ պաշտոնական այցելությունների ընթացքում իրենց բնակավայրերի բոլոր մնացած տասնյակ պրոբլեմները բարձրացնում են իմ առաջ: Բայց խնդիրն այն է, որ եթե մենք հիմա միանգամից ձեռնամուխ լինենք այդ բոլոր պրոբլեմների լուծմանը, մեծ է հավանականությունը, որ նրանցից որեւէ մեկը նորմալ չենք լուծի:

Ես առաջարկում եմ, որ բնակավայրերի բնակիչները հավաքվեն, քննարկեն, իրենց բնակավայրերի պրոբլեմները ռեյտինգավորեն՝ պրոբլեմ թիվ 1, պրոբլեմ թիվ 2, պրոբլեմ թիվ 3, մնացած 4-րդ, 5-րդ պրոբլեմները թողնելով մի կողմ: Նրանք հնարավորություն կունենան հանդիպելու կառավարության ներկայացուցիչներին եւ ինձ՝ մեր առջեւ խնդիրները դնելով այս ռեյտինգավորված տրամաբանությամբ:

Դա մեզ հնրավորություն կտա բնակավայրի հետագա պրոբլեմների լուծումը շարունակել այս ռեյտինգավորված տրամաբանությամբ, ինչը մեզ կազմակերպչական շատ մեծ ներդաշնակություն կտա պետական ինստիտուտների, համայնքի եւ համայնքի բնակիչների միջեւ: Սա է իմ առաջարկը»: