ՏԵՍԱՆՅՈՒԹ. Առուշ Առուշանյանը կկալանավորվի՞, թե՞ ոչ․ Մինասյանը պատասխանել է

Գորիսի համայնքապետ Առուշ Առուշանյանը կկալանավորվի՞, թե՞ ոչ․ կառավարության նիստից հետո լրագրողների ճեպազրույցում արդարադատության նախարար Գրիգոր Մինասյանն առաջարկեց չշտապել ու սպասել դատական նիստին։

«Փաստաբանները հարցեր են առաջ քաշում, որոնց հետ ես անձամբ համաձայն չեմ, բայց քանի որ այսօր ունենք ընթացիկ դատական գործ, սպասենք՝ սեպտեմբերի 3-4-ին նիստ է լինելու, կհասկանանք»,- նշեց Մինասյանը։

Նրա խոսքով՝ սեպտեմբերի առաջին շաբաթվա ընթացքում դատարանում քննվելու է Պրոբացիայի ծառայության ներկայացրած դիմումը՝ Գորիսի համայնքապետ Առուշ Առուշանյանի նկատմամբ կիրառել ազատազրկում։

Նախարարը շեշտեց՝ այս գործընթացում կարևորն այն է, որ ի վերջո դատարանն է որոշումը կայացնելու։

Հիշեցնենք, որ պրոբացիայի ծառայությունը դիմել էր Գորիս համայնքի ավագանուն՝ տեղեկացնելով, որ համայնքի ղեկավարը պետք է պաշտոնանկ արվի։ Ավագանու նիստի մասնակից 14 անդամները միաձայն արձանագրել են, որ գրության պահանջն ավագանու գործառույթներից դուրս է, առկա է այդ գործընթացը ավագանու կողմից կազմակերպելու անհնարինության վիճակ։

Գորիսի համայնքի ղեկավար Առուշ Առուշանյանը մեղադրվում է պաշտոնեական դիրքի չարաշահման, ինքնիրավչության, ինչպես նաեւ դիտավորությամբ այլ մարդու առողջությանը վնաս պատճառելու մեջ։ Դատական ակտը մտել է ուժի մեջ, բայց Առուշանյանը չի կատարում կետերից մեկը՝ հրաժարվել համայնքի ղեկավարի պետի պաշտոնից։ Ըստ դատավճռի՝ նա չի կարող 5 տարի պաշտոն զբաղեցնել։

Իր հերթին պրոբացիայի ծառայությունը դիմել է դատարան՝ Առուշ Առուշանյանի պատիժը ազատազրկմամբ փոխարինելու հայցով։ Գործը Սյունիքի մարզի ընդհանուր իրավասության դատարանի դատավոր Վարսենիկ Մելքոնյանի վարույթում է։ Նիստը նշանակված է սեպտեմբերի 3-ին։