ՄԱԳԱՏԷ-ի ղեկավարը վաղը կայցելի Կուրսկի ԱԷԿ

Օգոստոսի 27-ին Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսսին կայցելի Կուրսկի ատոմակայան՝ անձամբ գնահատելու կայանի իրավիճակը։ Նրա խոսքերը մեջբերում է գործակալության մամուլի ծառայությունը, գրում է RTVI–ը:

ՄԱԳԱՏԷ-ի համար բոլոր ատոմակայանների անվտանգությունն ու հուսալիությունը գլխավոր և հիմնարար խնդիրն է, ընդգծում է Գրոսսին։ Նա նշել է, որ ուշադիր հետևում է Կուրսկի ատոմակայանի շուրջ ստեղծված իրավիճակին՝ կապված կայանի մոտ «նոր իրադարձությունների և ռազմական ակտիվության մակարդակի բարձրացման հետ»։

«Միջուկային օբյեկտների անվտանգությունն ու հուսալիությունը ոչ մի դեպքում չպետք է վտանգի ենթարկվեն: Սա զարգացող իրավիճակ է, և չափազանց կարևոր է, որ վաղը, երբ ես ժամանեմ կայան, ես անձամբ տեսնեմ իրավիճակը և քննարկեմ հետագա գործողությունների պայմանները, որոնք կարող են պահանջվել Կուրսկի ԱԷԿ-ի միջուկային անվտանգության և հուսալիության վիճակը գնահատելու համար», - բացատրել է Գրոսսին:

Ուկրաինայի ԶՈւ-ի ներխուժումը Կուրսկի մարզ սկսվել է օգոստոսի 6-ին։ Երկու օր անց՝ օգոստոսի 8-ին, Ռոսատոմը հայտնել է, որ Կուրսկի ատոմակայանում հայտնաբերվել են խոցված հրթիռների բեկորներ։ Պետական ​​կորպորացիայի տվյալներով՝ հրթիռների մասերը հայտնաբերվել են ռադիոակտիվ թափոնների վերամշակման համալիրի տարածքում։ Օգոստոսի 9-ին Կուրչատովում, որտեղ գտնվում է Կուրսկի ատոմակայանը, անջատվել է տրանսֆորմատորային ենթակայանը։